18:30 / 22.07.2015
3212

Jasur Boyqo‘ziyev Korea Open turnirida g‘olib bo‘ldi

22 iyul kuni (-87) toifasida dunyoning birinchi raqamli taekvondochisi bo‘lib turgan Jasur Boyqo‘ziyev Janubiy Koreyada boshlangan Korea Open turnirida g‘oliblik shohsupasiga ko‘tarildi.

Bu orqali u Rio-2016 olimpiadasi uchun muhim hisoblangan 20 reyting ochkosiga ham ega bo‘lgan. Hozirda Boyqo‘ziyevning umumiy ochkolari 340taga yetdi.

Taekvondoning olimpiya o‘yinlari oilasiga mansub WTF yo‘nalishidagi eng nufuzli musobaqa hisoblangan ushbu turnirda O‘zbekiston terma jamoasining to‘liq tarkibdagi a'zolari ishtirok etishmoqda.

Boyqo‘ziyev ilk bahsda koreyalik sportchini 2:1 hisobida mag‘lub etdi. Ikkinchi uchrashuvda yana bir mezbon taekvondochi 17:5 hisobida taslim etildi. Jarohati sabab koreyalik uchinchi sportchi chorak finalga chiqmadi. Yarim finalda o‘zbekistonlik sportchi Jao Yongni 2:1 hisobida yutdi. Oltin medal uchun kechgan bahsda esa u eronlik Omid Amididan 9:5 hisobida ustun keldi.

23 iyul kuni jahon chempioni Dmitriy Shokin +87 kg vazn toifasida dayanga chiqadi. Shuningdek, aka-uka Nikita va Maksim Rafalovich, Sultonbek Chorshaboyev, Abror Nuriddinov, Vladislav Xan, Umida Abdullayeva, Go‘zal Norboboyeva kabi yetakchi sportchilarimiz ham o‘z imkoniyatlarini sinovdan o‘tkazishadi.

Top