Ayozqal'ada o‘tovlar qarorgohi tiklandi

Qoraqalpog‘iston hududida joylashgan Ayozqal'a arxeologik yodgorligi yaqinida o‘ziga xos o‘tovli qarorgoh yaratildi. Bu haqda “Pravda Vostoka” gazetasi yozmoqda.

Aytilishicha, ushbu qarorgohda sayyohlarga xizmat ko‘rsatish nuqtalari joylashgan. O‘tovlarda tashkil qilingan do‘konlarda turli esdalik buyumlari sotib olish, mahalliy ovqatlardan totib ko‘rish, shuningdek, mehmonxona o‘rnida ishlatib, yotib qolish mumkin.

Ayozqal'a qadimgi Xorazm madaniyatining eng diqqatga sazovor arxeolog yodgorliklaridan biri bo‘lib, ming yildan ortiq tarixga ega. Shahar miloddan avvalgi IV-III asrlarda qad ko‘tarib, milodiy VII-VIII asrlarga qadar mavjud bo‘lgan.
Qoraqalpog‘iston hududida, shuningdek, qadimgi Xorazmning boshqa yirik yodgorliklari joylashgan. Tuproqqal'a va Qo‘yqirilganqal'a shular jumlasidandir.