Polshaning eng badavlat kishisi olamdan o‘tdi

29 iyul kuni Avstriya poytaxti Vena shahrida Polshaning eng badavlat odami Yan Kulchik 65 yoshida vafot etdi. Bu haqda "Radio Polsha" nashri xabar bergan.

Marhum ishbilarmon Kulczyk Holding va Kulczyk Investments xalqaro investitsiya shirkatlari xo‘jayini, shuningdek energetika sohasidagi Polenergia va Serinus Energy shirkatlari, bir qator neft va gaz sohasidagi firmalar hamda pivo ishlab chiqaruvchi SABMiller kompaniyasi aksiyadori hisoblanardi.

Uning biznesi Yevropa hududidan tashqarida ham, Afrika va Janubiy Amerikada tarmoqlangan. U Ukrainadagi neft va gaz sohasi bilan shug‘ullanadigan Kulczyk Oil Ventures kompaniyasining 49,99 foizlik aksiyalariga egalik qilardi.

Qayd etilishicha, Kulchuk 2002 yildan buyon Polshaning eng badavlat kishilari ro‘yxatida bo‘lib, oxirgi yillarda doimiy ravishda bu ro‘yxatni boshqarayotgandi. Uning boyligi 16 mlrd zlotiy ekani hisoblangan.