Tesla Motors krossoveri sentabrda chiqariladi

Tesla Model X krossoveri shu yilning sentabrida taqdim etiladi, xaridorlar esa uni uchinchi chorak nihoyasida sotib olishi mumkin bo‘ladi. Bu haqda Tesla Motors kompaniyasining ikkinchi chorak yakunlariga bag‘ishlangan moliyaviy hisobotida aytildi.

Kompaniya o‘z elektrokarini 2013 yili ishlab chiqarmoqchi edi, ammo keyinchalik relizni 2014 yilga, so‘ng 2015 bahoriga ko‘chirdi. Nihoyat, oxirgi marta loyiha 2015 yil uchinchi choragiga ko‘chirildi.

Mashina bir chorakda 800 dona ishlab chiqarilishi aytilmoqda. Bundan tashqari, Model S mashinasi Model X bilan bitta konveyerda chiqarilmoqda. Kompaniya rahbari Ilon Mask loyihani “dunyodagi eng murakkab mashina ishlab chiqarish” deb baholadi.