Toshkentda Pushkin xiyoboni yaratiladi

Toshkent shahrida buyuk rus shoiri Aleksand Sergeyevich Pushkin haykali Yengil sanoat Davlat aksiyadorlik kompaniyasi qarshisidagi xiyobonga ko‘chirilib, u yerda Pushkin kutubxonasi va muzeyi ochilishi rejalashtirilmoqda. Bu haqda bugun, 10 avgust kuni Toshkent shahar hokimiyatida o‘tkazilgan brifing chog‘ida ma'lum qilindi.

Bir necha kun muqaddam OAVda Toshkent shahrida Pushkin sharafiga 1974 yili o‘rnatilgan haykalning ko‘chirilish haqida axborot paydo bo‘lgandi.

O‘zbekiston Respublikasi arxitektura va qurilish bo‘yicha davlat qo‘mitasi raisining birinchi o‘rinbosari Azamat To‘xtayevning ma'lum qilishicha, tashabbus Rus Milliy madaniyat markazi tomonidan ilgari surilib, shahar hokimiyati tomonidan ma'qullangan.

Kun.uz nashri muxbirining xabar berishicha, bronza haykalning qoplamasi va asosini restavratsiya qilib, uni Yengil sanoat vazirligi oldidagi, Shota Rustaveli va Bobur ko‘chalari kesishadigan joydagi maydonga ko‘chirish rejalantirilmoqda. U yerda, shuningdek, Pushkin davri uslubidagi, A. To‘xtayevning aytishicha, “o‘sha davr uslubidagi o‘rindiqlar va chiroqlar o‘rnatilgan” xiyobon yaratiladi.

Bundan tashqari, kutubxona va muzey, 300 o‘rinli avtoturargoh, shuningdek, xiyobon bo‘ylab Pushkin davri uslubiga moslashtirilgan ko‘cha kafelari yaratish imkoniyati ko‘rib chiqilmoqda.

“U yerda allaqachon Rustaveli va Bobur ko‘chalari bor, Rustaveliga haykal o‘rnatilgan, Bobur nomiga bog‘ ochilgan. Bular jahon adabiyotining ko‘zga ko‘ringan namoyandalaridir. Pushkin haykali ko‘chirilgach, Toshkentda o‘ziga xos adabiy uchburchak hosil bo‘ladi”, – dedi Rus Milliy madaniy markazi raisi Aleksandr Aristov.

Yangi majmuani yaratish bo‘yicha ishlar Mustaqillik kuniga qadar yakunlanishi aytilmoqda.