“Ansor Alloh” harakati tarafdorlari – husiychilar Birlashgan Arab Amirliklarining Yamandagi elchixonasini bosib oldi. Bu haqda BAA Tashqi ishlar vazirligi ma'lum qildi, deb xabar bermoqda RIA “Novosti” axborot agentligi.
“BAAning Yaman poytaxti Sanodagi elchixonasining husiychilar guruhi tomonidan bosib olinishini qat'iyan qoralaymiz”, deb aytilmoqda vazirlikning bayonotida.
Vazirlikning ma'lumotlariga ko‘ra, voqea 16 avgust kuni kechki payt yuz bergan.
Elchixonaning barcha xodimlari ko‘chaga haydab chiqarilgan va ichkariga kiritilmayapti.
BAA jangarilarning binoni bo‘shatishlarini talab qilmoqda va o‘zlarida “bosqinchilarni javobgarlikka tortish” huquqini saqlab qolishlarini ma'lum qildi.
“Bu harakatlar uni amalga oshirgan guruh xalqaro kelishuvlar va diplomatik me'yorlarga hech qancha ahamiyat bermasligi va “jungli qonunlari” bo‘yicha yashashining yana bir karra isboti bo‘ldi”, deb ta'kidlanmoqda vazirlikda.
BAA hukumati husiychilarning bunday harakatlari 1961 yildagi diplomatik aloqalar haqidagi Vena konvensiyasi va 2014 yilda qabul qilingan BMT Bosh assambleyasining 69/121 rezolyutsiyasinining buzilishi deb hisoblamoqda.