Putin 2-3 centyabr kunlarida Xitoyga safar qiladi

Rossiya prezidenti Vladimir Putin kutilganidek 2-3 sentabr kunlarida Xitoyga boradi. Bu haqda Rossiyaning Xitoydagi elchisi Andrey Denisovga asoslanib, RIA Novosti nashri xabar bergan.

Elchining qayd etishicha, Putin Xitoy xalq respublikasi raisi Si Tszinpin bilan muzokaralari davomida 22ta kelishuvni imzolashni rejalashtirgan.

"22ta hujjat to‘plami tayyorlanmoqda. Bu hujjatlar g‘arbiy yo‘nalishlarda gaz tashish masalalarini o‘z ichiga olishi kutilmoqda. Bu masalalarda muzokaralar anchadan beri olib borilmoqda. Agar kelishuvga erishilsa, hujjatlar imzolanadi. Yo‘qsa, ishlashda davom etiladi", deb ma'lum qilgan Denisov.

Bundan oldinroq, Putin Yaponiya bosh vaziri Sindzo Abe bilan Xitoyda sentabr oyi boshida uchrashishi mumkinligi xabar qilingandi.

Xabar qilinishicha, Putin Xitoyning Yaponiya ustidan g‘alabasining 70 yilligini nishonlash marosimida ishtirok etadi.