Jokovich US Open’da muxlisi bilan raqsga tushdi

Jahonning 1-raqamli tennischisi serbiyalik Novak Jokovich AQSh Ochiq chempionatining 2-davra uchrashuvidan keyin o‘z muxlisining u bilan birga raqsga tushish taklifiga bajonidil rozilik bildirdi. Bu haqda SB Nation nashri yozmoqda. 

Jokovich avstriyalik tennischi Andreas Xayder-Maurer ustidan g‘alaba qozongandan keyin Arthur Ashe Stadium kortida intervyu berayotgan paytda kortga uning muxlisi yugurib chiqib, qo‘lidagi futbolkani Jokovichga tutqazdi va uni o‘zi bilan raqs tushishga chorladi. Sportchi ham o‘zini yo‘qotib qo‘ymasdan, tomoshabinlarning qarsaklari ostida unga monand raqsga tusha ketdi.

So‘ngra muxlis Jokovichga o‘zi olib chiqqan “I love NY” (“Men Nyu-Yorkni sevaman”) degan yozuvi bo‘lgan futbolkani kiygazib qo‘ydi.

Jokovich avstriyalik tennischini 6:4, 6:1, 6:2 hisobida mag‘lub etdi. Jokovichning keyingi raqibi musobaqada 25-raqamli tennischi sifatida ishtirok etayotgan italiyalik Andreas Seppi bo‘ladi.

Jokovich 2011 yilgi US Open musobaqasining g‘olibi hisoblanadi. 28 yoshli serb hisobida hammasi bo‘lib “Katta dubulg‘a” seriyasida 12 ta g‘alaba bor.

US Open tennis musobaqasi Nyu-Yorkdagi Milliy tennis markaziy kortlarida o‘tkaziladi. Musobaqa ikki hafta davom etadi.