16:25 / 08.09.2015
4318

FIFA: Kuchli beshlikdagi jamoalar yozgi transferlar vaqtida 2,39 mlrd dollar sarflashgan

Yevropaning yetakchi beshta chempionatlari futbol klublari – Angliya, Fransiya, Germaniya, Italiya va Ispaniya – yozgi transfer oynasi davomida futbolchilar sotib olish uchun 2,39 mlrd dollar mablag‘ sarflashdi. Bu haqda hisobot FIFA rasmiy saytida e'lon qilingan.

Hujjatga ko‘ra, Yevropaning beshta yetakchi mamlakatlari klublarining yozgi transfer oynasi davomida sarflagan mablag‘lari 2014 yil bilan solishtirganda 2 foizga o‘sgan. Shuningdek, bir futbolchining o‘rtacha transfer narxi 2014 yildagi 5,5 mln dollardan 2015 yilda 5,7 mln dollarga oshgan.

Eng ko‘p xarajat qilgan ligalar ichida Angliya chempionati yetakchilik qilmoqda. Tumanli Albion jamoalari joriy yil yozda futbolchilar sotib olish uchun jami 996 mln. dollar sarflashgan. Bu boshqa yetakchi chempionatlar sarflagan mablag‘dan ikki baravardan ko‘proq ko‘rsatkich sanaladi. Ispaniyada bu yilgi ko‘rsatkich 2014 yilga qaraganda 23 foizga qisqarib, 495 mln. dollarni tashkil qilgan. Fransiyada esa o‘tgan yil bilan solishtirganda o‘sish sur'ati 65 foizga – 270 mln. dollargacha.

Shuningdek, hisobotda kuchli beshlik chempionati jamoalarining sotib olingan futbolchilar soni bo‘yicha 2013 yil bilan solishtirganda 4 foizga o‘sib, 1340 ta transferni tashkil qilgan.

Transfer oynasi ishtirokchilarining o‘rtacha yoshi ham o‘tgan yilgiga nisbatan bir oyga yoshargan va 23 yosh 9 oyni tashkil qilmoqda.

Top