13:33 / 12.09.2015
3256

Angliya chempionatining 5-turi anonsi

Yevropa chempionatlarida FIFA kunlari tufayli yuzaga kelgan tanaffus tugab, tur o‘yinlari davom ettirilmoqda.

Bugun Angliya chempionatida 5 tur o‘yinlariga start beriladi.

"Everton" - "Chelsi" (Toshkent vaqti bilan 16:45)
Turni "Everton" - "Chelsi" uchrashuvi ochib beradi. Joze Mourino shogirdlari muvaffaqiyatsizliklariga shu turda yakun yasashni reja qilishgan. Lekin ushbu tur arafasida jamoaning asosiy darvozaboni Tibo Kurtua safdan chiqdi. Endi kamida keyingi 2 oy mobaynida Asmir Begovich jamoaning asosiy darvozaboni bo‘ladi.
Mezbonlar esa 4 turdan keyin 5 ochko bilan turnir jadvalining 9 o‘rnida joylashgan. 14-o‘rindagi londonliklar hisobida esa 4tagina ochko.

"Arsenal" - "Stok Siti" (19:00)
Londonning yana bir jamoasi "Arsenal" o‘z maydonida "Stok Siti"ni kutib oladi. Ko‘pchilik Venger shogirdlarining g‘alabasiga shubha qilmayapti. "Arsenal" ayni paytda 7 ochko to‘plagan holda 5-6 o‘rinlarni "MYu" bilan bo‘lishib turibdi. 5 tur arafasida "kanonirlar" tarkibida yo‘qotishlar yo‘q.
"Stok Siti" esa 4ta o‘yindan atigi 2 ochko olgan va 18 o‘rinni band etgan. Jamoa yozgi transferlar darichasi yopilishi arafasida Jyerdan Shakirini transfer qildi va u bugun maydonga tushishi mumkin.

"Kristal Pelas" - "Manchester Siti" (19:00)
Yangi mavsumda yengilmasdek taassurot uyg‘otayotgan "shaharliklar"ni bu turda muhim o‘yin kutmoqda. Pellegrini shogirdlari safarda o‘zini turnir jadvalida ta'qib etib kelayotgan "Kristal Pelas" jamoasiga qarshi kurash olib borishadi. Qolaversa bu o‘yinni David Silva o‘tkazib yuboradi. "Manchester Siti" safida ushbu o‘yinda jamoaning yangi xaridlaridan biri Kevin de Bryuyne debyut qilishi mumkin.
Ayni vaqtda "Siti"da 12 ochko, "Kristal Pelas"da esa 9 ochko mavjud.

"Manchester Yunayted" - "Liverpul" (21:30)
Bu turdagi yana bir markaziy o‘yin azaliy raqiblar "Manchester Yunayted" hamda "Liverpul" o‘rtasida o‘tkaziladi. "MYu" safida bu o‘yinda David de Xea harakat qilishi kutilmoqda. Runi esa bu o‘yinni o‘tkazib yuborishi aytilgan. "Mersisaydliklar" safida esa jamoaning asosiy yetakchisi Koutino diskvalifikatsiya tufayli maydonga tusha olmaydi.
Ayni vaqtda "MYu" 7 ochko bilan 5chi o‘rinda, "Liverpul" esa shuncha ochko bilan 7chi o‘rinda joylashgan.

"Uotford" - "Suonsi" (19:00)
Bugun shuningdek, chempionatda yaxshi start olgan "Suonsi" jamoasi mavsum debyutanti "Uotford" maydoniga safar qiladi. Andre Ayyu yetakchiligidagi uelsliklar ayni vaqtda 8 ochko bilan to‘rtinchi o‘rinda. "Uotford" 4 o‘yindan bittasida g‘alaba qozongan va uchtasida mag‘lub bo‘lgan - 17 o‘rin.

"Vest Bromvich" - "Sautgempton" (19:00)
Turnir jadvalida 15 o‘rinni egallab turgan "Vest Bromvich" bu turda Kuman shogirdlarini qabul qiladi. "Sautgempton" jamoasi esa o‘tkazilgan 4 o‘yinda 5 ochko jamg‘argan.

"Norvich Siti" - "Bornmut" (19:00)
5 turda APLning ikki debyutanti o‘zaro to‘qnashadi. Oxirgi turlarda "Bornmut" hujumchisi Uilsonning o‘yini ochilib bormoqda. "Bornmut" uning gollari evaziga keyingi 2 turda 4 ochko qo‘lga kiritdi. Mezbonlar ham 4ochko bilan 13 o‘rinda joylashishgan.

13 sentabr kungi o‘yinlar

"Sanderlend" - "Tottenxem" (17:30)
13 sentabr kuni APLda yana 2 o‘yin o‘tishi belgilangan. Mavsumni omadsiz boshlagan ikki jamoa o‘zaro uchrashadi. Mehmonlar safida koreyalik hujumchi Son Xyong Min debyut qilishi kutilmoqda.

"Lester" - "Aston Villa" (20:00)
Mavsumni ko‘tarinki ruhda boshlagan "Lester" o‘z maydonida Tim Shervud shogirdlarini qabul qiladi. 5 tur arafasida "Lester" 8 ochko bilan uchinchi o‘rinda, "Aston Villa" esa 4 ochko bilan 12 o‘rinda turibdi.

14 sentabr
"Vest Xem" - "Nyukasl" (00:00)
Turni "Vest Xem" va "Nyukasl" jamoalari yakunlab berishadi.

Top