Qosimjonov Jahon kubogini durang bilan boshladi

Ozarbayjon poytaxti Boku shahrida shaxmat bo‘yicha Jahon kubogi start oldi. Dunyoning kuchli 128 nafar shaxmatchisi dona surayotgan yilning ushbu nufuzli musobaqasi olimpiya tizimida o‘tkazilib, har bir bosqichdan so‘ng mag‘lubiyatga uchragan ishtirokchi turnirni tark etdi. 

Jahon kubogida 35-raqam ostida tasniflangan 17-jahon chempioni Rustam Qosimjonov 1/64 final bosqichida kanadalik Aleksey Kovalev bilan uchrashdi. Reytingda raqibidan ancha yuqorida turishiga qaramay, hamyurtimiz bu partiyada durang bilan cheklandi. Bugun shaxmatchilar yana bir bor to‘qnash kelishadi.

Eslatib o‘tamiz, Jahon kubogining umumiy mukofot jamg‘armasi 1 million 600 ming dollarni tashkil etadi. G‘olib shaxmatchi 96 ming dollarga ega bo‘ladi. Vitse-chempion 64, yarim finalchilar 40, chorak finalga yetib kelgan grossmeysterlar esa 28 ming dollarga o‘z hamyonlarini boyitib olishadi.

Manba. olamsport.com