Serena Uilyams US Open turniri finaliga chiqa olmadi

AQShning Nyu-York shahrda yakuniga yetib borayotgan “Katta Dubulg‘a” turkumiga kiruvchi US Open turnirining ayollar o‘rtasidagi bahslarida final ishtirokchilari ma'lum bo‘ldi. E'tiborlisi, ilk bor ushbu musobaqaning finaliga bir yo‘la ikki nafar italiyalik tennischilar yetib kelishdi.

Serena Uilyams va Roberta Vinchi o‘rtasidagi yarim final uchrashuvida mezbonlar vakili kutilmaganda 6:2, 4:6, 4:6 hisoblarida mag‘lub bo‘ldi.

Bu bilan Roberto raqibasini joriy yil hisobidan o‘tkazilgan barcha “Katta Dubulg‘a” turnirlari bosh mukofotini qo‘lga kiritishdan mahrum qildi. Shuningdek, Vinchi Serenaning 33ta o‘yindan iborat g‘alabali seriyasiga ham chek qo‘ydi.

Undan oldinroq esa italiyalik yana bir tennischi Flaviya Pennetta ruminiyalik Simona Xalepni 6:1 va 6:3 hisoblarida yengib finalga chiqqandi.

Ma'lumot uchun, 31 avgust kuni boshlangan AQSh ochiq chemionati 13 sentabr kuni yakunlanadi. Turnirning mukofot jamg‘armasi 42 253 400 dollarni tashkil etadi. Bahslar xard kortlarda o‘tkazilmoqda.