Symphony kompaniyasi Uoll-Strit moliyaviy tashkilotlariga mo‘ljallangan ijtimoiy platformani ishga tushirdi. Bu haqda kompaniya xabarnomasidan ma'lum bo‘ldi.
Platforma yangiliklar hamda tahlilchilarning fikrlarini berib boradi, u, shuningdek, elektron pochta bilan uyg‘unlikda ishlaydi. Tashqi jihatdan servis Twitter’ga o‘xshash bo‘ladi: unda xeshteglar bo‘ladi. Xakerlardan platformani himoya qilish uchun ishlab chiqaruvchilar shifrlash texnologiyasidan foydalanmoqda.
Yangi mahsuloti yordamida Symphony Bloomberg LP va Thomson Reuters terminallari bilan raqobatga kirishmoqchi. Bunda asosan ko‘rsatiladigan xizmatlarning arzonroq bo‘lishiga umid bildirilmoqda. Masalan, platformadan foydalanish uchun oyiga 15 dollar to‘lash kerak bo‘ladi, vaholanki Bloomberg terminallarining bir oylik narxi 1 850 dollar turadi.