Ucell kompaniyasining bosh aksiyadori O‘zbekiston bozoridan ketadi

TeliaSonera kompaniyasi “Yevrosiyo” mintaqasidagi, shu jumladan, O‘zbekistondagi faoliyatini ham sekin-asta to‘xtatadi. Bu haqda kompaniya prezidenti Yoxan Dennelind axborot berdi.

Kompaniyaning manfaat doirasidagi “Yevrosiyo” mintaqasiga, O‘zbekistodan tashqari, Qozog‘iston, Tojikiston, Ozarbayjon, Moldova, Gruziya va Nepal kiradi.
«Biz bu jarayonni bir bozordan ikkinchi bozorga o‘tkazib boramiz, chunki har bir mamlakatda va har bir kompaniyada o‘ziga xos vaziyat, ammo bizning vazifamiz oxir-oqibat butun mintaqani tark etishdir”, — dedi kompaniya rahbari.

Joriy yilning iyun oyida TeliaSonera’ga aksiyalarining asosiy qismi tegishli bo‘lgan Ucell kompaniyasi 7 yilligini nishonladi. Ayni paytda uning abonentlari miqdori 8.5 mln kishini tashkil qiladi. Mamlakat bo‘ylab kompaniyaning 22 ofisi joylashgan, dilerlik tarmoqlari 2 300dan ortiq savdo punktlarini o‘z ichiga oladi.