Gretsiyada navbatdan tashqari parlament saylovlari boshlandi

Gretsiyada 20 sentabr kuni mahalliy vaqt bilan 07:00 (Toshkent vaqti bilan 08:00)dan muddatidan avval parlament saylovlari boshlandi. Mamlakatda taxminan 9,837 mln fuqaro ovoz berish huquqiga ega. Ular bir palatali parlamentning to‘rt yillik muddatdagi 300 deputatlik o‘rni uchun kurash olib borayotgan 14ta partiya nomzodlariga ovoz berishadi.

Ovoz berishlar avvalgi parlament saylovlaridan 18 oy o‘tmagan bois, partiya ro‘yxati asosida bo‘lib o‘tmoqda. Shuning uchun saylovchi faqatgina o‘zi qo‘llab-quvvatlaydigan partiyaga ovoz beradi va familiyalar qatoriga qo‘shuv belgisini qo‘ymaydi. Aks holda, byulleten yaroqsiz deb hisoblanadi.

Saylov uchastkalari 19:00ga qadar ishlaydi.

Gretsiya IIVning TASS muxbiriga ma'lum qilishicha, 21:00dan so‘ng saylovlarning dastlabki natijalari, ikki partiya o‘rtasidagi farq 1 foizni tashkil etsa ham, e'lon qilinadi.

“Bu mamlakatning 8 hududidan natijalar elektron shaklda yuborilishi evaziga ta'minlanadi. Avvallari esa saylov natijalari telefon orqali ma'lum qilinar, bu esa ko‘p vaqtni talab etar edi”, – dedi IIV vakili.

Yakuniy natijalar esa 21 sentabr kuni erta tongda ma'lum qilinadi.

Asosiy kurashlar 41 yoshli Aleksis Tsipras yetakchiligidagi radikal so‘l kuchlar koalitsiyasi va 61 yoshli rahbari Vangelis Meymarakis rahbarligidagi evolyutsion o‘zgarishlar tarafdori hisoblangan “Yangi demokratiya” o‘ng markazchilar o‘rtasida bo‘lib o‘tishi kutilmoqda.

G‘olib partiya hukumatni shakllantirish huquqiga ega bo‘ladi. Agarda u mutlaq ko‘pchilik — 151 o‘ringa ega bo‘lmasa, kamroq mandatlarni qo‘lga kiritgan partiya bilan koalitsiya tuzilishi lozim. Aks holda, Gretsiya prezidenti vazirlar mahkamasini tuzish huquqini ikkinchi eng ko‘p ovoz to‘plagan partiyaga topshiradi.