Samarqand viloyatida gilamdo‘zlik studiyasi ochiladi

30 sentabr kuni Samarqand viloyati Pastdarg‘om tumanidagi Sayram qishlog‘ida qo‘lda gilam to‘qish studiyasi ochiladi. Ushbu studiya Samarkand viloyati va Pastdarg‘om tumani hokimliklari, shuningdek, «O‘zbekistonning qishloq tumanlarida barqaror hamjamiyatlar yaratish: iqtisodiy ravnaq va sog‘lom atrof muhit» sinov loyihasi doirasida BMTTDning «Suv resurslarini kelishgan holda boshqarish va Zarafshon daryosi basseynida suvni tejash» loyihasi sa'y-harakatlari bilan yaratildi. Bu haqda "Gazeta.uz" xabar bergan.

Ushbu namuna loyihasini amalga oshirishda BMTTD va «Coca Cola» kompaniyasining «Yangi dunyo: Insoniyatning inklyuziv barqaror taraqqiyoti bo‘yicha tashabbuslar» deb nomlangan global dasturi moliyaviy ko‘mak ko‘rsatib, ayni maqsad uchun 75 ming AQSh dollarilik mablag‘ ajratdi. Loyihadan ikkita maqsad: birinchisi — qishloq joyda qo‘lda gilam to‘qish studiyasi ochish, ikkinchisi — qishloq aholisini sifatli ichimlik suvi bilan ta'minlash, shuningdek, aholining sanitariya va gigiyena masalalaridan ogohligi va potensialini oshirish ko‘zlangan.

BMTTD loyihasidan xabar qilishlaricha, studiyada ishlab chiqarish jarayoni to‘laqonli bo‘lishini ta'minlash maqsadida dastgoh, texnika, mebel va usbob-uskunalar sotib olish, mutaxassis va konsultantlarni jalb qilish uchun jami 51 ming dollar sarflandi. «O‘zbekistonda ishlab chiqarilgan» yorlig‘i bilan mahsulot ishlab chiqarish uchun ishchi yollash masalasi o‘sha joyning o‘zida hal etildi. Pastdarg‘om tumanidagi Sayram va Kanalyoqa qishloqlarida yashovchi ayollar orasidan tanlab olinganlar uchun «Samarqand-Buxoro ipak gilami» qo‘shma korxonasi o‘rnida tashkil etiladigan studiyada tabiiy ipakdan qo‘lda gilam to‘qish texnikasi, dizayn va marketing bo‘yicha ikki oylik amaliy kurs tashkil qilindi.

Tinglovchilar ushbu san'at turining paydo bo‘lish tarixi, o‘ta murakkab naqshlarni hosil qilish texnikasi, ipak tolalarini bo‘yash, shuningdek, qadim zamonlarda onalardan qizlarga o‘tib kelgan dizayn namunalari bilan tanishdi. Qo‘lda gilam to‘qish murakkab va sermehnat jarayon bo‘lib, maxsus ko‘nikma, toqat, sabr, chaqqonlik va diqqatni talab qiladi. Umuman olganda, ushbu ko‘hna san'at turi bilan 30 dan oshiq ayol tanishdi.

Studiyaning ochilish marosimida O‘zbekistonda ilk marta ishlab chiqilib, chop etilgan «Qo‘lda ipakdan gilam to‘qish qo‘llanmasi» taqdimoti bo‘lib o‘tadi.