Week: Trampning g‘oyalari Putinga yana bir sovg‘adir

Amerikalik biznesmen, AQSh prezidentligiga nomzodlar orasida yetakchi o‘rinlarda ketayotgan Donald Tramp Rossiyaning Suriyadagi harbiy kampaniyasini qo‘llab-quvvatladi. Bu xatti-harakatlari bilan u Vladimir Putin uchun AQSh prezidentligiga eng yaxshi nomzod bo‘lishi mumkin, deb hisoblaydi Week nashri.
Putin Yaqin Sharqdagi harbiy to‘ntarishlar va turfa inqiloblarga keskin qarshi chiqqan bir paytda, G‘arb davlatlari ularni qo‘llab-quvvatlaydi. Jumladan, AQSh prezidenti Barak Obama Suriyada prezident Bashar Asad hokimiyatdan ketishi lozimligini ta'kidlamoqda.
Ammo Donald Trampning yaqindagi chiqishlari bu borada uning pozitsiyasi Putinnikiga yaqinroq ekanligini ko‘rsatib berdi. Uning fikricha, AQSh boshchiligidagi ittifoqchilar mintaqaga tartibsizliknigina olib kelishdi.
Shuningdek, Tramp suriyalik qochqinlarning katta qismi IShID jangarilari ekanligini va ular Yevropada harbiy to‘ntarish uyushtirishi mumkinligini taxmin qilgan edi.