Suriyadagi janglarda eronlik 2 general halok bo‘ldi

Suriyada jangarilarga qarshi olib borilgan janglarda ishtirok etayotgan eronliklar armiyasining 2 nafar generali halok bo‘ldi. Bu haqda "Tasnim" axborot agentligi xabar bergan.

Ma'lum qilinishicha, dushanba kungi janglardayoq general-mayor Farshad Hasanzoda va brigada generali Hamid Muxtorband halok bo‘ldi.
Ularning ikkisi ham Islom inqilobi muhofazasi Korpusi a'zolari bo‘lishgan. Ular aynan qaysi hududda halok bo‘lishganiga aniqlik kiritilmagan.

Eslatib o‘tamiz, 14 oktabr kuni Suriya armiyasi Halabda Erondan yetib kelgan 1000 kishilik qo‘shin hamda "Hizbulloh" guruhi bilan hamkorlikda keng ko‘lamli harbiy harakatlarni boshladi.

Bundan oldinroq, 8 oktabr kuni Halab yaqinida eronlik general Husayn Hamadoniy jangarilarga qarshi amaliyotlar vaqtida halok bo‘lgani ma'lum qilingandi.
Ayni vaqtda Suriya armiyasi Halabning g‘arbiy qismida nazoratni qo‘lga olgan. Shaharning yana bir qismi jangarilar qo‘lida qolmoqda.