O‘zbekistonga latviyalik vazir keladi

19 oktabrdan 22 oktabrga qadar Latviya Respublikasi Atrof-muhitni muhofaza qilish va mintaqaviy rivojlanish vaziri K.Gerxards boshchiligidagi toza texnologiyalar sohasidagi tadbirkorlar delegatsiyasining O‘zbekiston Respublikasiga tashrifi bo‘lib o‘tadi. Bu haqda O‘zbekiston respublikasi tabiatni muhofaza qilish qo‘mitasi saytida xabar qilingan.

Tashrifning maqsadi iqtisodiyotni ekologizatsiya qilish, ekologik toza texnologiyalarni tatbiq etish, suvlarni tozalash, chiqindilarni qayta ishlash hamda utillashtirish sohasidagi hamkorlikning istiqbolli yo‘nalishlari bo‘yicha o‘zaro fikr, tajriba almashish hisoblanadi.

Latviya delegatsiyasining Respublikasiga tashrifi doirasida vazirlik va idoralar, xususan, O‘zbekiston Respublikasi Tabiatni muhofaza qilish davlat qo‘mitasi, Tashqi iqtisodiy aloqalar, investitsiyalar va savdo vazirligi, "O‘zbekiston temir yo‘llari" aksiyadorlik jamiyati rahbar shaxslari bilan qator uchrashuvlar, shuningdek, ekologik toza texnologiyalar sohasida o‘zaro tajriba almashish bo‘yicha amaliy seminarni tashkillashtirish rejalashtirilgan.