A321 layneri qulashidan oldin odatdagi parvoz uchun xos bo‘lmagan tovushlar qayd qilingan

Sinayga qulab tushgan A321 samolyoti uchuvchilari halokat vaqtiga qadar hech qanday texnik nosozlik haqida bilishmagan. Bu haqda Qohiradagi manbasiga asoslanib, "Interfaks" xabar bergan.

A321 samolyotining qulashi bo‘yicha olib borilayotgan tergovga yaqin manbaning xabar berishicha, «qora quti»dan qulagan rus samolyoti bo‘yicha olingan ma'lumotda "Ekipaj uchuvchilarining muloqoti o‘rganib chiqilganida, samolyot radarlardan yo‘qolishiga 4 daqiqa qolgan vaqtda ham ular hech qanday nosozlikni sezishmagan va dispetcherlar bilan odatdagiday gaplashib ketishgan. Ular tang vaziyat mavjudligi haqida xabar qilishmagan", deyiladi manbada.

Uning aytishicha, "qora quti"da hech qanday noxush tovushlar ham yozilmagan. Uchuvchilar tang vaziyatga tushganlari haqida xabardor etishmagan.

Biroq uning aytishicha, layner radarlar ekranidan yo‘qolish vaqtida yozuvda odatdagi parvoz uchun xos bo‘lmagan tovush qayd qilingan.

“Yozuvga ko‘ra, bortdagi favqulodda vaziyat to‘satdan sodir bo‘lib, uchuvchilar uchun kutilmagan holat paydo bo‘lgan, shu sababli ekipaj falokat signalini yubora olmay qolgan”, - dedi axborot manbasi.

Eslatib o‘tamiz, 31 oktabr kuni Misr vaqti bilan 6:51 da (Toshkent vaqti bilan 9:51) Rossiyaning "Kogalimavia" aviakompaniyasiga tegishli Sharm ash-Shayx — Sankt-Peterburg yo‘nalishi bo‘yicha 9268 reysini amalga oshirayotgan Airbus-321 layneri parvozga ko‘tarilgandan 23 daqiqa o‘tib radarlar ekranidan yo‘qoldi. Mazkur samolyot bortida 217 nafar yo‘lovchi va yetti nafar ekipaj a'zosi bo‘lgan.