Turkmaniston prezidenti Gurbanguli Berdimuhamedov 3 noyabr kuni Ashxobodda AQSh davlat kotibi Jon Kerri bilan uchrashuv o‘tkazdi. Kerrining rasmiy safari AQSh diplomatiyasi rahbariyatining ushbu mamlakatga 1992 yildan buyon birinchi tashrifi bo‘ldi.
Uchrashuv chog‘ida Berdimuhamedov ikki davlat o‘rtasidagi hamkorlikning uch asosiy yo‘nalishini ajratib ko‘rsatdi: siyosat, iqtisodiyot va madaniy-gumanitar soha.
Bundan tashqari, joriy yilda Turkmanistonning neytral maqomi tan olinganligiga 20 yil to‘lishi alohida ta'kidlandi. 12 dekabr kuni Ashxobodda “Doimiy neytralitet: tinchlik, xavfsizlik va rivojlanish uchun hamkorlik” nomli xalqaro konferensiya bo‘lib o‘tadi. Vaziyatdan foydalanib, Berdimuhamedov AQSh prezidenti Barak Obama hamda davlat kotibini mamlakat poytaxtida o‘tadigan forum va bayram tadbirlariga yana bir bora taklif qildi.
O‘z navbatida, Jon Kerri Berdimuhammedovga va Turkmaniston xalqiga iliq qabul uchun minnatdorchilik bildirdi. Shundan so‘ng ko‘pgina muhim ijtimoiy-siyosiy masalalar borasida fikr almashildi.