Farg‘onada ilk marta yurak operatsiyasi o‘tkazildi

Farg‘onada ilk marta yurak operatsiyasi o‘tkazildi. Bu haqda O‘zbekiston Milliy axborot agentligi xabar berdi.
Xabarda keltirilishicha, Farg‘ona viloyat ko‘p tarmoqli bolalar tibbiyot markazida ilk bor tug‘ma yurak nuqsoni bilan davolanayotgan ikki nafar bolada murakkab jarrohlik amaliyoti muvaffaqiyatli amalga oshirildi.

Farg‘ona viloyatida 18 yoshgacha bo‘lgan o‘g‘il-qizlarga yuqori malakali tibbiy xizmat ko‘rsatishga ixtisoslashgan viloyat ko‘p tarmoqli bolalar tibbiyot markazi 2013 yili zamonaviy binoga ko‘chib o‘tdi. 2014 yilda esa yangi davolash korpusi foydalanishga topshirildi. Markaz faoliyati kengayib, jarrohlik, reanimatsiya, ortopediya, pulmanologiya, gastroenterologiya, kardiorevmatologiya, nevrologiya bo‘limlari qatoriga oftalmologiya va urologiya bo‘limlari ham qo‘shildi. Ayni kunlarda bu yerda ilg‘or usullar asosida murakkab jarrohlik amaliyotlari ham o‘tkazilmoqda.

Markazda ko‘rsatilayotgan tibbiy xizmat sifatini yanada yaxshilash maqsadida tug‘ma yurak nuqsoni tashxisi bilan dispanser nazoratida turgan bemorlarni jarrohlik yo‘li bilan davolash yo‘lga qo‘yilmoqda.
Jahon sog‘liqni saqlash tashkiloti ma'lumotiga ko‘ra, dunyoda har ming chaqaloqning 6-7 nafarida tug‘ma yurak nuqsoni qayd etiladi. Bu xastalikni operatsiya yo‘li bilan butunlay bartaraf etish va bemorni to‘laqonli hayotga qaytarish mumkin.
Mamlakatimizda bunday xastalik aniqlangan bemor bolalarni sog‘lomlashtirish borasida salmoqli ishlar amalga oshirilmoqda.

Mazkur markazda ilk bor o‘tkazilgan tug‘ma yurak nuqsoni bilan davolanayotgan bolalardagi jarrohlik amaliyoti ana shulardan biridir.
Furqat tumanining Tomosha qishlog‘ida yashovchi Mirzaxo‘ja Niyozxo‘jayev 1999 yilda tug‘ilgan. U tug‘ilganidan buyon dispanser nazoratida turadi. Bemor hansirash, yurakning tez-tez urishi, holsizlik kabi shikoyatlar bilan shifoxonaga yotqizilgan.
Qo‘shtepa tumanidan Ikromjon Ibrohimov esa uch yoshda. U ham tug‘ma yurak nuqsoni, ochiq arterial protok tashxisi bilan dispanser nazoratiga olingan.

Har ikki bemorda tug‘ma yurak nuqsoni – ochiq arterial protokni bog‘lab qo‘yish operatsiyasi muvaffaqiyatli amalga oshirildi va reanimatsiya bo‘limida intensiv muolajalar olib borildi. Bolalarning ahvoli stabillashgach, muolajalarni davom ettirish uchun jarrohlik bo‘limiga o‘tkazildi.
– O‘g‘lim ozgina yursa ham, o‘ynasa ham tez charchab, lablari ko‘karib ketardi, – deydi Ikromjonning onasi Dilrabo Fozilova. – Uch yoshli bola o‘zining charchayotganini, holsizlanib borayotganini sezardi. Oxirgi paytlarda sal yursa, “Ko‘taring” deydigan bo‘lib qoldi.

Umid qilamanki, bolamning dardi ortda qoldi. Shifokorlarga ming rahmat.
Jarrohlik amaliyotida viloyat ko‘p tarmoqli bolalar tibbiyot markazi kardioxirurgi Javlon Mo‘ydinov, jarrohlik bo‘limi mudiri Ibrohim Umarov, tibbiyot fanlari nomzodlari – Andijon davlat tibbiyot instituti klinikasi kardioxirurgi Abdunosir Turg‘unov va Respublika ixtisoslashtirilgan kardiologiya markazining anesteziolog-reanimatologi Sanjar Omonov ishtirok etdi.

– Shu choqqacha bunday operatsiya Toshkentda yoki xorijda amalga oshirilardi, – deydi bolalar jarrohi, “El-yurt hurmati" ordeni sohibi Ibrohim Umarov. – Endi bunday murakkab operatsiyalarni viloyatimizda amalga oshirish imkoniyati yaratildi. Qanchadan-qancha bolajonlarni davolab, ota-onalar ko‘ziga quvonch qaytarishimiz mumkin. Bu borada birinchi qadam tashlanganidan va amaliyot muvaffaqiyatli o‘tganidan xursandmiz.