Mustaqil yurtimning har bir go‘shasida bo‘lsangiz, unda hukm surayotgan tinchlik, farovonlik va olib borilayotgan bunyodkorlik ishlaridan ko‘nglingiz ko‘kka bo‘y cho‘zadi.
Rosti, kindik qoni to‘kilgan zaminni, farzandim deb milliy qadriyatlarimiz ruhida tarbiyalab, voyaga yetkazgan yurtni unutgan kimsalarning ko‘zi, taffakuri ojizligi atrofidagi har bir unsurda Vatan aksini ko‘ra olmasligida bo‘lsa kerak.
Axir, Vatan va uning ne ekanligini his etish, uning surat va siyratini anglash qonimizda ajdodlardan meros...
Hozirgi kunda yoshlarimizni turli yot oqim va fitnachi guruhlar ta'siriga tushib qolmasligini oldini olish jamiyat uchun dolzarb vazifalardan biri. O‘sib kelayotgan yosh avlod o‘z qadrdon yurtidan faxrlanib, o‘zgacha g‘urur bilan ulg‘ayishlari lozim. Chunki, biz obod va ozod o‘lkada yashab umrguzaronlik qilyapmiz.
Kasbim taqozosi bilan yonimda doim fotouskuna va yondaftarcha yuradi. O‘zimni hayratga solgan manzaralarni ham so‘z, ham tasvir orqali muhrlash ham odatga aylangan. Bugun sizlarga Andijon shahridagi Bobur maydoni haqida so‘zlab bersam:
Bobur maydoni
Atrofga suvdan kamalak jilosini burkab turgan musiqiy favvora va turfa gullarga burkangan maydon to‘rida buyuk ajdodimiz Zahiriddin Muhammad Bobur tulporda viqor bilan bilan kelajakka nigoh tashlaydi. Atrofga taralayotgan mayin kuy ajib muhit paydo qilgan.
Ko‘rib turganingiz, shoir va sarkarda bobomiz orzu qilgan farovon kunlar ro‘yobining aslidek, go‘yo. Ushbu fayzli hiyobonga bir bor tashrif buyursangiz, yana bir kelishni dilingizga tuyasiz.
Ha, Andijon shahrida qayta ta'mirlanib, zamonaviy ko‘rinishda go‘zallashgan Bobur maydoni ayni kunda shahar aholisi va mehmonlarning dam olish maskaniga aylangan
Maydonning eng diqqatga sazovor joylaridan biri - musiqiy fontan bo‘ldi. Suv, musiqa va chiroqlar illyuminatsiyasi bir maromga moslashtirilgan. Tovushni kuchaytiruvchi moslamalar shunday joylashtirilganki, musiqa sadolari butun maydon va uning tashqarisiga ham tarqaladi. Andijonga oqshom qo‘nganida razm solsangiz ranglar jilosida raqs tushayotgan favvora sehrli ko‘rinish kasb etgandek...
Kunduz kunlari olam-olam orzular bilan yangi oila qurayotgan kelin-kuyovlar sarkarda va shoir bobolarini yo‘qlab keladilar. Farzandlari dunyo mo‘jizalaridan biri bo‘lgan muhabbat saroyi - Tojmahalni qurgan dilbar shaxs haykali yonida o‘z sevgi qasrlarini bunyod etishga ahdu-paymon qilishadi.
Oppoq libosdagi suluv kelinchakni yoniga olib, do‘stu-yorlar davrasida shodon sayr qilib yurgan kuyov yigitni suhbatga tortamiz. – Bugun kelinchagim Mavjudaxon bilan hayotimizdagi eng baxtli kunni Bobur maydonida nishonlashdan boshladik,- deydi kuyov yigit Ixtiyorjon Sulaymonov. Do‘stlarim va turmush qurayotgan jufti halolimning dugonalari bilan hiyobonni aylanib, ajib lahzalarni fotosuratlarga muhrladik.
Yo‘lingiz tushib Andijonga kelsangiz, albatta Bobur maydonini bir ko‘rib o‘ting. Shunda siz yilning to‘rt faslida ham chiroyini yo‘qotmaydigan hiyobonda baxtli insonlarning farovon hayotidan mamnun holda tabassum bilan sayr qilayotganiga guvoh bo‘lasiz.
Elmurod ERMATOV (muallif olgan fotosuratlar)
Andijon manzaralari:
