Erdo‘g‘an: gaz va neftni qayerdan olishimizni hamma biladi

Turkiya prezidenti Rajab Toyib Erdo‘g‘an Parijda o‘tayotgan iqlimiy konferensiya doirasida jurnalistlarga bergan intervyusida Rossiya tomonidan rasmiy Anqaraga qo‘yilayotgan ayblovlarga javob berdi.

Ilgariroq Rossiya prezidenti Vladimir Putin Turkiyani IShID bilan hamkorlikda, jumladan, terrorchilardan neft sotib olishda ayblagan, bunga javoban Erdo‘g‘an, agarda ayblovlarga isbot keltirilsa, iste'fo berishini ta'kidlagan edi.

“Qonuniy yo‘llar bilan neftni qayerdan olyapmiz, tabiiy gazni qayerdan olyapmiz, bularning hammasi ma'lum. Terrorchi guruhlar bilan bunday oldi-sotdi qiladigan darajada g‘urursiz emasmiz. Buni hamma bilib qo‘yishi lozim”, - dedi u.

“Bugun bu yerda bir gapni aytaman, - uning so‘zlarini keltiradi Hürriyet nashri. – Bunday narsa isbotlangan taqdirda millatimiz g‘ururi shuni talab qiladi. Men bu maqomda turmayman, ammo hurmatli Putindan so‘rayman, sen o‘z maqomingda qolasanmi? Men bu haqda ochiqcha gaplashaman”.