AQSh Suriyaga 5.2 mlrd dollar sarfladi

AQSh prezidenti Barak Obama o‘zining murojaatida Kongress Suriyada IShIDga qarshi kurashni davom ettirishga ruxsat berishi lozimligini ta'kidladi. Ayni paytda AQSh u yerdagi operatsiyani oliy bosh qo‘mondon bo‘lgan prezidentning topshirig‘iga binoan amalga oshirmoqda. Ammo respublikachilar prezidentning terrorga qarshi kurashi yetarli samara bermayapti deb hisoblamoqda.

O‘z navbatida, Barak Obama, IShIDni yo‘q qilishga va'da bergani bilan, yer usti operatsiyasi o‘tkazilmasligiga ishora qildi. Respublikachilarning fikricha esa, bunday harbiy amaliyotsiz raqibni butunlay tor-mor keltirib bo‘lmaydi. Iroq va Suriyadagi jangarilarga havodan zarba berish bilan ish bitmaydi, deb hisoblamoqda ular.
Shu bilan birga, Obama Kongress olib borilayotgan harbiy harakatlarni tasdiqlashni yana bir bora so‘radi.

“Kongress amerikaliklar tashqi xatar oldida birlashganini va bu kurashga sodiqligini ko‘rsatadigan payt keldi”, - ta'kidladi Oq Uy rahbari.
Bugungi kunga qadar Suriyadagi harbiy amaliyotlarga sarflangan mablag‘ 5.2 mlrd dollarni tashkil qilmoqda, lekin natija haligacha ko‘rinmayapti. Bu ham muxolif kuchlar va respublikachilar partiyasi namoyandalarining keskin tanqidlariga sabab bo‘lmoqda.

Xalqaro xavfsizlik sohasi mutaxassisi professor Igor Zevelevning fikricha, AQShda prezidentlik poygasi bo‘layotgani tufayli har qanday masala katta siyosat darajasiga olib chiqilmoqda. Shunga qaramay, bugungi kunda mamlakatda Suriya masalasiga bo‘lgan yondashuv siyosatchi va faollarni ikki qutbga ajratmoqda: isteblishmentning bir guruhi qat'iy choralar ko‘rish tarafdori bo‘lsa, boshqa qismi izolyatsionizm yo‘lidan borish hamda mo‘'tadil tadbirlarni amalga oshirish tarafdorlaridir.