Insonlar bilan foydali muloqotda bo‘lishimiz o‘zimiz uchun yaxshi hisoblanadi.
Buning uchun atrofimizga o‘zimizga munosib bo‘lgan va zarari tegmaydigan kishilarni yig‘ishimiz kerak.
Bugun sizga darhol voz kechishingiz kerak bo‘lgan yetti turdagi insonlar ro‘yxatini keltirib o‘tamiz. Negaki, ularning o‘rniga, yaxshi, xushchaqchaq va ruhiyatingizga yaqin insonlar kelishi uchun joy hozirlanishi kerak.
1. Janjallar “qirolicha”si
Ayrim kishilar ziddiyatli vaziyatlarni yuzaga keltiradigan asabiyligi oqibatida janjal chiqarishdan “rohatlanishadi”. Undaylarga imkon bera ko‘rmang! Undaylarga duch kelsangiz, xotirjamlikni saqlashga harakat qiling. O‘zingizga ortiqcha asabiylashish va janjal orttirmang. Qarshingizdagi kishi janjal chiqarishga harakat qilsa, siz xotirjamlik va ishonch bilan unga janjalni xohlamayotganingiz va bunga hojat yo‘qligini tushuntiring. Agar janjalkash kimsa bilan tortishsangiz, bu kayfiyatingizga salbiy ta'sir ko‘rsatadi va ortiqcha asabbuzarlik tufayli salomatligingizga ziyon yetadi. Shuning uchun uni yo‘lingizdan sekingina chetga uloqtiring-da, e'tiboringizni bo‘lmay olg‘a yuring.
2. Shaxsiyatingizga tegadigan kimsalar
Hayot yo‘limizda bizni hurmat qiladigan, qadrlaydigan insonlar bilan birga, kamsitadigan, tahqirlashga urinadigan kimsalarni ham uchratamiz. Undaylarni tushunish, kechirish va xuddi ular istagandek inson bo‘lishga urinish bilan vaqtingizni yo‘qotmang! Sizni boringizcha qabul qilib, shundayligingizcha hurmat qilmagan insonlardan indamay uzoqlashing. Bu - o‘z shaxsiyatingizni hurmat qilganingiz bo‘ladi!
3. Orzularingiz qanotini kesadigan pessimist kishilar
Orzularingiz ustidan kulib, ularni tahqirlashga urinadigan kimsalardan hech ikkilanmay uzoqlashing! Bundaylar o‘zingizdagi ichki ishonch, qat'iyatni sindiradi. Ruhingizni cho‘ktiradi. Afsuski, insonlarni orzu-umidlariga erishish yo‘lidan qaytarish bilan rohatlanadigan kimsalar ham bor. Atrofingizda shundaylar bo‘lsa, ularni o‘zingizga yaqinlashtirmaslikka harakat qiling. Unutmang, ehtiyojlaringiz va uddalashingiz mumkin bo‘lgan narsalardan boshqalarning fikriga ko‘ra voz kechmang! Hayotga optimistik nigoh bilan qarang. Siz o‘ylaganingizdan ortig‘iga munosibsiz! Allakimlarning fikri va munosabati orzularingizga chegara qo‘yishga haqdor emas!
4. Mutaassib kishilar
Agar atrofingizda o‘z fikrini hamma vaqt to‘g‘ri deb biladigan, o‘ta mutaassib, salbiy qarashlari bilan fikrlaringizga bosim o‘tkazishga urinadigan kishilar bo‘lsa, har doim asabiylashib, tushkunlikka tushishning hojati yo‘q. Shunchaki, ulardan osongina voz keching, o‘zingizdan uzoqlashtiring! Ular yon-atrofida yuz berayotgan voqea-hodisalarga mutlaqo parvo qilishmaydi. Qachon qarasangiz, fikri-xayoli o‘z falsafasi bilan band bo‘ladi. Basharti ularga yaqinlashsangiz, sizga ham fikrini o‘tkazishga va bu bilan ruhiyatingizga salbiy ta'sir o‘tkazishga urinishadi.
5. Qaysar kishilar bilan hisoblashish shart emas
O‘tgan yillar mobaynida ulg‘ayganingiz va hayotga qarashlaringiz o‘zgarganini tushunmaydigan qarindosh-urug‘ingiz yoki eski do‘stlaringiz nazarida ular xohlagandek inson bo‘lishga majbur emassiz! Ularning xohish-istagi, o‘y-fikrlari sizga ma'qul kelmaganiday, sizning ham dunyoqarashingizni ular qabul qilolmayapti. Bunday holatlarda kimgadir moslashish, kimningdir ko‘ngli uchun ruhiyatiga begona bo‘lishiga qaramay u bilan do‘stlashish – ruhiyatingiz uchun xavfli. Shunchaki hammaning ham o‘z haqiqati bor. Ammo bu siz ularning haqiqati oldida bosh egishingiz kerak, degani emas! Boshingizda qanday xayollar bor va nimalarni rejalashtiryapsiz - bular sizning shaxsiy ishingiz. Siz amalga oshirmoqchi bo‘lgan ish kimgadir yoqmasa - bu uning muammosi. Hammaga birdek yoqishni va hayotdagi maqsadlaringiz, bajarmoqchi bo‘lgan ishlaringiz barcha yaqinlaringizga ma'qul bo‘lishini o‘ylamang. Zero siz bunga majbur emassiz ham!
6. Xatolaringizni kechirmaydigan qattiqqo‘l do‘st
Hech qachon adashmaydigan, xato qilmaydigan insonning o‘zi yo‘q. Odam xato qilib o‘rganadi, adashib to‘g‘ri yo‘lga chiqadi. Insonlikning qoidasi shu - xatolardan tajribalar orttirib ulg‘ayib, aqli to‘lib ketaveradi. Bilib-bilmay xato qilganingizda qo‘lingizdan tutib sizga to‘g‘ri yo‘l ko‘rsatish o‘rniga ayblaringizni ochib, izza qiladigan do‘stdan uzoqlashing. O‘tmishdagi xatolaringiz uchun tinmay sizni uyaltiradigan va uzringizni qabul qilmaydigan do‘st bilan kelajak yaxshi kunlaringizga borolmaysiz. Yaxshisi, uni o‘tmishda qoldirganingiz ma'qul.
7. O‘zingizni tanqid qilishni to‘xtating!
Haddan ortiq ko‘p tanqid qiladigan kishidan o‘ylab o‘tirmay uzoqlashing! To‘g‘ri, tanqid kelajak mevasi. Ammo hamma narsada me'yor bo‘lishi kerak. Me'yoridan oshgan tanqid ruhiyatga salbiy ta'sir o‘tkazadi. Shuningdek, o‘z-o‘zingizni ham tinmay tanqid qilishni to‘xtating. Hayotingizda nimadir ro‘y berishi kerak bo‘lsa, o‘z-o‘zidan bo‘laveradi. O‘zingizni qadrlay oling. Atrofingizdagilar sizni boringizcha qabul qilishsin. Albatta har bir insonning o‘ziga xos jihati bo‘lganidek, sizning ham betakror, noyob fazilatlaringiz bor va bu xususiyatlaringiz bilan boshqalardan farqlanishingiz tabiiy. Boshqalar sizdek bo‘lolmaganlaridek, siz ham ularga o‘xshamaysiz. Buning uchun qimtinib yurishingiz yoki o‘zgalar sizni tanqid qilishlari kerak emas. Hayotdan zavqlanib yashang. Har lahzani baxt biling. Hatto qiyin muammolarni ham quvnoqlik, xushchaqchaqlik va xotirjamlik bilan hal qilish mumkin.
Hayotingiz go‘zal va mazmunli o‘tishi o‘z qo‘lingizda.