AQSh prezidentligiga demokratlardan nomzod Hillari Klinton mamlakatda terrorga qarshi kurashning qisqacha rejasini taqdim etdi. Bu haqda Reuters agentligi xabar bermoqda.
Klinton xonimning so‘zlariga qaraganda, hukumat San-Bernardinodan so‘ng yangi teraktlarga hozirlik ko‘rishi hamda Kremniy vodiysi mutaxassislari bilan birga ishlab, ijtimoiy tarmoqlar orqali terrorchilarni topish ishini faollashtirishi lozim.
Bundan tashqari, siyosatchi Suriyada aviazarbalar berishni kuchaytirish hamda IShID hukmron hududlardan tashrif buyurayotgan odamlarni jiddiyroq tekshirish zarur deb biladi.
Shuningdek Klinton xonim qurol-yarog‘ qonunchiligini qattiqqo‘llashtirish lozim deb topdi. O‘zining CNN telekanalidagi chiqishida prezidentlikka nomzod mamlakat musulmon jamoasini “bizning mushtimiz, o‘sayotgan radikallashuv va terrorga qarshi oxirgi va eng yaxshi himoya” deb atadi.