Anadolu muxbiri Putinga savol berishda Turkiya bayrog‘ini ko‘tardi

Ma'lumki, kecha Rossiya prezidenti Vladimir Putin 1 392 jurnalist ishtirokida katta matbuot anjumani o‘tkazdi. Davlat rahbarining diqqatini tortib, o‘z savolini berish uchun jurnalistlar qo‘llarida koptok, qalam, bo‘yinbog‘ va boshqa predmetlarni ko‘tarishdi.

Hatto ayrimlar “Homiladorlarga navbat bering”, “Hammaga uy berilsin”, “Neft”, “Ona” singari shiorlar yozilgan transparantlarni ko‘tarib kirishdi. Anadolu axborot agentligining muxbiri Yelena Teslova esa bu borada o‘ziga xos yo‘ldan borib, qo‘lidagi Turkiya bayrog‘ini baland ko‘tardi.

Ta'kidlanishicha, tadbirda xavfsizlik choralari har doimgidan kuchaytirilgan. Faqat muxbirning ismi yozilgan va surati yopishtirilgan akkreditatsiya kartasiga ega shaxslar detektorlarda tekshiruvdan o‘tkazilib kiritilgan. Ortiqcha narsalar olib qolingan. Shunga qaramay, ko‘plar yuqorida tilga olingan buyumlarni olib kirishga muvaffaq bo‘lgan.

Putin Teslovaning qo‘lidagi bayroqni ko‘rishi hamon unga so‘z navbatini berilishiga ishora qildi. Jurnalist ayol davlat rahbariga ikkita savol berdi:
- Siz Turkiya siyosiy elitasini turk xalqidan ajratishingizni aytgandingiz. Shunday ekan, Turkiyaning Moskvadagi elchixonasiga uyushtirilgan hujum, turkiyalik talabalar va ishbilarmonlarning mamlakat tashqarisiga chiqarib yuborilishini qanday baholaysiz?
- Vena kelishuvlariga qaramay, Asadning kelajagi haqidagi savollar ochiq qolib ketdi.

AQSh va Rossiya muzokaralaridan so‘ng bu masalada biror yangilik bo‘lsa, Asad o‘tish davrida ishtirok eta oladimi? Nyu-Yorkdagi muzokaralarda qanday pozitsiyada turasiz?
“Putindan so‘raydigan ko‘p savollarim bor edi, shuncha jurnalist ichida uning diqqatini torta olishim kerak edi, - dedi Teslova anjumandan so‘ng. – Men Anadolu axborot agentligida ishlayman. Shu bois Turkiya bayrog‘ini ko‘tarishga qaror qildim”.