O‘zbek kinosi tarixida ilk marotaba zamonaviy 4K formatda film suratga olindi. “O‘zbekkino” Milliy agentligi buyurtmasi asosida rejissyor Rustam Sa'diyev tomonidan suratga olingan “Baron” filmiga ayni paytda Magic Pro Production studiyasida ranglar jilosi bilan sayqal berilmoqda.
Rejissyorning Kun.uz muxbiriga ma'lum qilishicha, jahon standartlariga javob beruvchi mazkur kartina IMAX kinozallarida ham namoyish etishga mo‘ljallangan holda suratga olindi. Tasvirga olish ishlari 2015 yil may oylarida boshlangan bo‘lib, sentabr oyida ovozlashtirish ishlariga yetib kelindi.
Bugungi kunda filmni rus va ingliz tillariga o‘girish ishlari ham jadallik bilan olib borilmoqda. “Baron” premerasi 2016 yilning boshida bo‘lib o‘tishi rejalashtirilgan.
Eslatib o‘tamiz, mazkur kartinada "Karib dengizi qaroqchilari", "Muqaddas zamin" kabi Gollivud filmlaridagi ishtiroki orqali tanilgan aktyor Gassan Massud bosh rolni ijro etish uchun taklif etilgan.
Rejissyor Rustam Sa'diyev bilan bo‘lib o‘tgan intervyuning to‘liq matni yaqin soatlarda e'tiboringizga havola etiladi.