Putin milliarderlarni maqtadi

24 dekabr kuni Rossiya prezidenti Vladimir Putin yirik biznes vakillari bilan yillik uchrashuv o‘tkazdi. U kompaniyalarning inqiroz paytidagi strategiyalari tahsinga sazovor bo‘lganini qayd etib, nazorat organlarini tartibga solishga va'da berdi.

Tadbirda 50ga yaqin tijoratchilar va davlat kompaniyalari rahbarlari tashrif buyurdi. Ular orasida Vladimir Potanin, Oleg Deripaska, Viktor Vekselberg singari biznesmenlar, davlat korxonalaridan esa “Gazprom” rahbari Aleksey Miller, “Rosneft” rahbari Igor Sechinlar bor edi. Shuningdek, “Kasperskiy laboratoriyasi” bosh direktori Yevgeniy Kasperskiy hamda “Gruppa “Ilim” direktorlar kengashi raisi Zaxar Smushkinlar ham tadbirda ishtirok etdi.

Uchrashuv Moskva vaqti bilan soat 18:00ga mo‘ljallangan edi, lekin Putin yana biznesmenlarni kutishga majbur qildi: Hindiston delegatsiyasi bilan uchrashuvda ikki soatga ushlanib qoldi.

Putin Yangi yil bilan barcha ishtirokchilarni tabrikladi, so‘ng mamlakat iqtisodiyotidagi qiyinchiliklar haqida gapirdi. Davlat rahbari yirik biznes vakillari mas'uliyatni his qilgan holda harakat qilayotganini ta'kidlab o‘tdi hamda ularga minnatdorchilik bildirdi.