2013 yilgi Ukraina voqealaridan buyon birinchi marta Rossiya matbuoti va boshqa axborot kanallari orqali Kiyev asosiy dushman sifatida ko‘rsatilmayapti. “Medialogiya” kompaniyasining hisob-kitoblariga qaraganda, 2015 yil oxirida uning o‘rnini Turkiya egalladi.
Bundan tashqari, hisobot davrida OAV va bloglar AQSh va IShIDni dushman sifatida tasvirlashgan.
2015 yilning 9 oyi mobaynida “dushmanlar” reytingida birinchilikni Ukraina hech kimga bermay keldi, uning ortidan AQSh bordi. Har ikkala davlatga nisbatan dushmanlik kayfiyati sekin-asta tushib bordi.
Yil boshida Ukraina hukumati odatda “xunta” deb atalgan bo‘lsa, yil oxiriga kelib bu atama deyarli unutildi. Yil boshida OAVda Ukraina-dushman 2.5 ming marta, bloglarda 1.3 ming marta tilga olindi; yil oxiriga kelib bu ko‘rsatkichlar 1.5 ming va bir necha yuzga tushib ketdi.
Shuningdek, Ukraina hukumatini “noqonuniy” deb, ukrainaliklarni esa “banderachilar”, “fashistlar” deb atash holatlari oydan oyga tushib borgan.
Ukrainaga nisbatan salbiy ritorika 2014 yil oxirida prezidentlikka Pyotr Poroshenko saylanishi bilan, AQShga nisbatan salbiy fikrlar esa davlat kotibi Jon Kerrining may oyidagi tashrifidan so‘ng tushib, kamayib bordi.
Lekin 2015 yilning oxirgi choragida “dushmanlar” ro‘yxati keskin o‘zgardi: birinchi o‘rinlarga dastlab IShID, so‘ng Turkiya chiqib oldi. Rossiya 30 sentabrda Suriyada harbiy operatsiya boshlashi bilan IShID ko‘proq asosiy dushman sifatida tilga olina boshlandi. “Dushman” so‘zi IShIDga nisbatan operatsiyaning dastlabki ikki haftasida 40 martacha qo‘llangan. Shu bilan bir paytning o‘zida AQSh endilikda Rossiya matbuotida IShIDning homiysi va ittifoqchisi deb atala boshlangan.
24 noyabrda Turkiya harbiy kuchlari Su-24 samolyotini urib tushirishi bilan dushmanlik reytingida shubhasiz birinchi pog‘onani Anqara zabt etdi. Har haftada “Turkiya” va “terrorchilik” so‘zlari o‘rtacha 150 marta yonma-yon kelgan. Ko‘rsatilgan sanadan so‘ng Rossiya televideniyesi “IShID homiysi” shablonini endi Turkiyaga nisbatan qo‘llay boshlagan.