O‘zbekiston Tashqi ishlar vazirligi bilan kelishuv asosida AQShning Toshkentdagi favqulodda va muxtor elchisi Pamela Spratlen Navoiy viloyatiga tashrif buyurdi.
Elchi safari davomida "Navoiy" xalqaro aeroporti hamda Erkin sanoat-industrial zona bilan tanishdi. U Navoiy viloyati hokimi Erkinjon Turdimov bilan ham uchrashuv o‘tkazgan.
Safar tashkilotchilari elchining Sarmishsoy darasiga tashrifini ham uyushtirishgan.
Safarning yakuniy bosqichida Navoiy davlat pedagogika universiteti rektori, oliygoh o‘qituvchilari hamda talabalari bilan uchrashuv o‘tkazilgan. Yoshlar u bilan ingliz tilida shahar va universitet ta'limi mavzusida suhbat qurishgan. Elchi o‘zining safari davomida olgan taassurotlari bilan o‘rtoqlashgan. Talabalar elchiga o‘zlarini qiziqtirgan savollar bilan murojaat qilishgan. Uchrashuv so‘nggida Pamela xonimga Navoiy shahri haqidagi kitob va navoiyliklarning milliy libosini sovg‘a qilishgan.