YeXHT rahbarligi Serbiyadan Germaniyaga o‘tdi

2016 yilning 1 yanvaridan boshlab Germaniya Yevropada xavfsizlik va hamkorlik tashkilotiga (YeXHT) raislikni rasmiy ravishda Serbiyadan qabul qilib oldi.

“GFRning YeXHTdagi raisligidan umid katta. Ammo hozirgi beqaror davrda bu vazifani qay darajada uddalay olishimizni hech kim aytib bera olmaydi”, - deydi Germaniya Tashqi ishlar vaziri Frank-Valter Shtaynmayyer.

Vazir GFRning raisligi vaqtida manfaatli muloqotlar o‘tkazish orqali, tashkilotga a'zo davlatlar xavotir olayotgan masalalarni hal etishda faollik ko‘rsatishini ta'kidlagan. Xususan, Minsk kelishuvi doirasida Ukrainada o‘t ochish to‘xtatilayotganini Berlin ijobiy baholashini, ammo yakuniy natijasi qanday tugashiga kafolat yo‘qligini bildirgan.

YeXHT dunyoda xavfsizlikni ta'minlash bo‘yicha savollarni hal qilish bilan shug‘ulanadigan hududiy tashkilot. Bu tashkilot Shimoliy Amerika, Yevropa va Markaziy Osiyodagi 57 davlatni birlashtirgan. Bu tashkilot tashkil etilgan 1973 yilda o‘z tarkibida 33 davlatni birlashtirgandi. Tashkilotning barcha a'zolari teng huquqli a'zolar hisoblanadi.