Toshkentda uka akasining pullarini o‘g‘irlab ketdi

Toshkent shahrida Jalol ismli fuqaro o‘z akasiga tegishli pullar va moddiy qimmatliklarni o‘g‘irlab ketganlikda ayblanib hibsga olindi. Bu haqda “Na postu” gazetasi yozmoqda.

Aytilishicha, Jalol betartib hayot kechirgan va bir necha bor qamalib chiqqan. Qamoqdan chiqqach, akasi Zokirning uyida vaqtinchalik yashab turgan. Bu orada karcherda ishlab ham kelgan, ammo ishga mas'uliyatsiz yondashgan. Uning o‘zini tutishidan norozi bo‘lgan akasi uni tez-tez koyib turgan, buning natijasida ikki orada kelishmovchilik yuzaga kelgan. Shunda Jalol akasining uyidan ko‘ziga ko‘ringan narsani olib, chiqib ketishni rejalashtirgan.

Bir safar u yolg‘izligida akasining bank plastik kartasini va planshetini topib olgan va uydan chiqib ketgan. Karcher bo‘yicha sherigi Botirxon bilan plastik kartadagi pullarga kayfu safo qilgan, pul tugagach, planshetni ham sotib yuborgan.

Bir necha kundan so‘ng Zokirning uyiga kelgan o‘g‘li Mahmud planshetning yo‘qligini ko‘rgan. Zokir plastik kartasining yo‘qolganini ham aniqlagan. Gap nimadaligini tushunib, tegishli tashkilotlarga murojaat qilgan.IIV xodimlari tez orada o‘g‘rini qo‘lga olib, tergov harakatlaridan so‘ng ishni sudga oshirgan.