Fominning onasi ham muxlislardan uzr so‘radi

O‘zbekiston olimpiya terma jamoasi himoyachisi Maksimilian Fominning onasi Tatyana Fomina o‘g‘lining Feysbukdagi murojaati uchun muxlislardan uzr so‘radi. Uning murojaatini Safinas Ahayeva ismli foydalanuvchi keltirgan.

"Ushbu xabarni yozishni mendan Maksning onasi Tatyana iltimos qildi. Boisi, uning Feysbukda sahifasi yo‘q, ammo u sodir bo‘lgan voqeadan xavotirga tushdi", deya izoh beradi Safinas Ahayeva.

"Hurmatli, ishqibozlar, avvalo Maksimning dastlabki keskin fikrlari uchun uzr so‘rayman. U jahl ustida yozgan va hozir bundan afsuslanmoqda. Lekin, iltimos, siz ham to‘g‘ri tushuning, jamoa sha'niga haqoratlar yog‘dirilganidan keyin, shuningdek, meni ham haqorat qila boshlashganidan so‘ng... Bu o‘yin, bu sport. Bugun g‘alaba qozonilsa, ertaga mag‘lubiyat bo‘lishi mumkin. Muvaffaqiyat yoki muvaffaqiyatsizlikka qaramay, o‘yinchilarimiz sizlarning qo‘llab-quvvatlashingizga muhtoj. To‘g‘ri tushunasiz, degan umiddaman. Hurmat bilan, Tatyana Fomina".

Eslatib o‘tamiz, Iroqqa qarshi o‘yindagi mag‘lubiyatdan keyin muxlislar futbol saytlarda futbolchilarni keskin tanqid va haqorat qilgani uchun Maksimilian Fomin Feysbuk orqali ishqibozlarga haqoratlarga to‘la murojaat yo‘llagandi.

Futbolchining ushbu xatti-harakati keskin noroziliklarga sabab bo‘ldi.

Natijada Fomin Feysbuk orqali muxlislardan uzr so‘ragandi.