2015 yil sport olamidagi eng yaxshi suratlar

O‘tgan yil turli xil sport voqealariga boy bo‘ldi. Sportchilarning chiqishlarini millionlab ishqibozlardan tashqari professional fotograflar ham kuzatishdi va ko‘plab qiziqarli suratlar tushirishga muvaffaq bo‘lishdi. 

Chang‘ida tramplindan sakrashi hayajonlanmasdan kuzatib bo‘lmaydi: sportchilar katta tezlik va yuqori balandlikda yuzlab metrlarni zabt etishadi. Norvegiyalik sportchi Anders Fannemel 2015 yilda Shvetsiyaning Falun shahrida bo‘lib o‘tgan jahon birinchiligida oltin medalni qo‘lga kiritdi.

«Los-Anjyeles Dojyers»ning pitcheri Mett Shomeker «Detroyt Taygers»ga qarshi bellashuvda to‘pni uloqtirishga tayyorgarlik ko‘rmoqda. Mavsum yakunlariga ko‘ra Kaliforniya jamoasi asosiy beysbol ligasining chorak finalida ishtirokini yakunlab chempionlikni qo‘lga kirita olmadi. 

Frantsuz velopoygachisi Uilyam Bonne iyulda ko‘p kunlik «Tur de Frans» musobaqasining uchinchi bosqichida velosipedchilarning ommaviy yiqilishi paytida jiddiy jarohatlangandi. Sportchining miyasi chayqalgan va bo‘yin umurtqasi singandi. U oktabrga kelib harakatlana boshladi, endi u o‘zini tiklab olishi uchun ancha vaqt darkor.

«Aylenders» xokkeychisi Tayler Kennedi 2015 yil martida «San-Xose Sharks» jamoasidan Nyu-York jamoasiga o‘tgandi. O‘tgan mavsumning 13 uchrashuvida kanadalik hujumchi yangi klubi safida ikkita shayba urdi va uchta golli uzatmani amalga oshirdi. Ushbu mavsumda u «Nyu-Jyersi Devils» tarkibida o‘ynamoqda, lekin hozircha raqiblar darvozasini ishg‘ol eta olmadi.

O‘tgan mavsumda amerikalik yosh markaziy o‘yinchi Frenk Kaminski talabalar sporti milliy assotsiatsiyasi o‘yinlarida porlagandi. MBAning mazkur chempionati boshida 22 yoshli basketbolchi «Sharlott Xornets» klubiga qo‘shildi. 

Kanadalik suzuvchi Erik Xedlin o‘tgan yili Panamerika o‘yinlarida ishtirok etdi. Bu musobaqalarda Shimoliy, Janubiy va Markaziy Amerika sportchilari qatnashishadi. Xedlin o‘n kilometrli marafonda startga chiqdi va marraga to‘qqizinchi bo‘lib yetib keldi.

Australian Open turnirining erkaklar yakkalik bahslari yarim finalida chex Tomash Berdix va britaniyalik Endi Marrey uchrashuvi o‘ta hayajonli bo‘ldi va uch yarim soat davom etdi. Bahs paytida chexiyalik tennischi to‘pni yeb qo‘yishiga sal qoldi, lekin yakunda g‘alaba Marreyga nasib etdi.

«Garlem Globtrotters» — ko‘rgazmali musobaqalar va tomoshalar ko‘rsatuvchi Amerikaning basketbol jamoasi. O‘tgan yilning may oyida jamoa a'zolari Rim papasi Frantsiskning Vatikandagi qarorgohiga safar uyushtirishdi va unga to‘pni barmog‘ida aylantirishni o‘rgatmoqchi bo‘lishdi.

Vengriyalik suzuvchi Katinka Xossu — jahon sportining taniqli yulduzi. O‘tgan yili Qozonda o‘tkazilgan suv sporti turlari bo‘yicha jahon chempionatida sportchi ikkita oltin va bitta bronza medaliga sazovor bo‘ldi. Unda hozircha olimpiya medallari yo‘q, shuning uchun Rio-de-Janeyroda bo‘lib o‘tadigan o‘yinlarda u bor mahoratini ishga soladi.

Ot sporti juda xavfli va tomoshabop sport turi hisoblanadi. Otlar turli to‘siqlardan oshib o‘tayotib muvozanatini yo‘qotadi, chavandozlar esa o‘zlarini yerda ko‘rishadi. Angliyada bo‘lib o‘tgan Cheltenxem festivalida qatnashayotgan irlandiyalik Rabi Uolsh bilan shunday hol yuz berdi.

Pekinda bo‘lib o‘tgan balandlikka sakrash bo‘yicha ayollar turniri ishtirokchilari navbatdagi urinishdan oldin hordiq chiqarishmoqda. Musobaqalarda rossiyalik Mariya Kuchina bosh sovrinni qo‘lga kiritdi.

Kriket bo‘yicha Hindiston terma jamoasi sardori Virat Koxli — jahonda ushbu sport turi bo‘yicha eng ko‘p unvonni qo‘lga kiritgan sportchilardan. Koxli hayotini sportsiz tasavvur qilolmaydi va jamoasining yutuq-mag‘lubiyatlarida o‘z hissiyotini yashirmaydi.

Mariya Sharapovaning sobiq yigiti — bolgariyalik tennischi Grigor Dimitrov o‘tgan yili birorta ham musobaqada g‘alaba qozona olmadi. Madriddagi musobaqada Rafael Nadalga qarshi bahsda tennischining asabi dosh bermadi va uning raketkasi chilparchin bo‘ldi.

Amerikacha futbol —regbiga o‘xshaydi, lekin bu sport turlari qoidalarida jiddiy tafovutlar mavjud. «Baltimor Reyvens» o‘yinchisi Marshal Yanda «Arizona Kardinals» o‘yinchisi Kevin Minter bilan murosasozlik qilib o‘tirishni o‘ziga ep ko‘rmadi.

Ko‘plab sportchilar gadjyetlarni yoqtirishadi va ijtimoiy tarmoqlardan faol foydalanishadi. Amerikacha futbol bo‘yicha «Arkanzas Reyzorbaks» o‘yinchilari navbatdagi o‘yin oldidan vaqtlarini shunday o‘tkazishmoqda.

Meksikalik sportchi Karlos Lamadrid Panamerika o‘yinlarida o‘ta muvaffaqiyatsiz qatnashdi. Slalom bo‘yicha 18 sportchi ishtirok etgan musobaqada u 17-o‘rinni egalladi.

Turkiyalik gimnastikachi Ibrohim Cholak Bokuda o‘tkazilgan birinchi Yevropa o‘yinlarida halqalarda mashq bo‘yicha broza medaliga sazovor bo‘ldi.

Futbolchilar juda irimchi bo‘lishadi. «Manchester Siti» hujumchisi Serxio Aguero ham ana shundaylardan. Angliya chempionatida «Nyukasl»ga qarshi o‘yinda xet-trikka erishgach, Argentina terma jamoasi hujumchisi to‘pni o‘pib qo‘yishga qaror qildi.

Asli pokistonlik britan bokschisi Amir Xon may oyida vatandoshi Kris Aligeriga qarshi uchrashuvda WBC Silver kamarini himoya qildi. Nyu-Yorkda bo‘lib o‘tgan bahs davomida Xon raqibiga nisbatan faolroq harakat qildi. Hakamlar bir ovozdan uning g‘alaba qozonganini e'tirof etishdi.

Fransiyaning Evian shahrida bo‘lib o‘tayotgan golf bo‘yicha ayollar turnirini muxlislar qiziqish bilan kuzatishmoqda.

Yamaykalik sprinter Useyn Bolt Pekindagi jahon chempionatida teleoperatorning oyog‘iga qoqilib ketib jiddiy jarohat olishiga oz qoldi. Uning baxtiga hammasi yaxshilik bilan tugadi va ko‘p karra olimpiya hamda jahon chempioni bo‘lgan sportchi salgina qo‘rqib ketdi xolos.

Asosiy beysbol ligasining (MLB) «Kanzas Siti Royals» jamoasi o‘yinchisi Terrans Gor o‘tgan mavsum yakunlariga ko‘ra shaxsiy mukofot olishga erishmadi. Biroq jahon beysbolidagi eng yuqori unvonga uning jamoasi ligada g‘alaba qozonib sazovor bo‘ldi.

O‘tgan mavsum rossiyalik tennischi Mariya Sharapova uchun unchalik omadli bo‘lmadi. Tennischi WTA tasnifidagi ikkita turnirda g‘alaba qozondi, lekin Ulkan dubulg‘a musobaqalarida u birorta ham g‘alabaga erishmadi. 

Venesuelalik 20 yoshli og‘ir atletikachi Jyenezis Rodriges Gomes Panamerika o‘yinlarida jiddiy jarohat olishiga bir bahya qoldi. Og‘irligi 53 kilogrammli sportchi 106 kilogrammli shtangani ko‘tarmoqchi bo‘ldi, lekin mashq paytida hushidan ketib qoldi. Shundan keyin ham qiz musobaqalarda qatnashdi va hatto ikkinchi o‘rinni egalladi. 

Har qanday avtopoyga jiddiy xavf bilan bog‘liq, tomoshabinlar tez-tez qo‘rqinchli halokatlar guvohiga aylanishadi. Poygachi Larri Dikson musobaqa paytida yuz bergan halokatda mo‘'jiza tufayli jabrlanmadi.

Futbol bo‘yicha Xitoy terma jamoasi darvozaboni Zeng Cheng Osiyo Kubogi musobaqasida Saudiya Arabistoniga qarshi bahsda darvozasiga penalti belgilagan hakamga noroziligini bildirmoqda.

Ispaniyalik tennischi Rafael Nadal o‘tgan mavsumda bor mahoratini namoyish eta olmadi va ATRning atigi uchta turnirida g‘alabaga erishdi. Monte-Karloda bo‘lib o‘tgan musobaqalarda Rafani vatandoshi David Ferrer yarm finalga yo‘l olishiga imkon bermadi.

Chim ustida xokkey bo‘yicha Angliya terma jamoa a'zosi Aleks Denson o‘tgan yili Yevropa chempionatida oltin medalni qo‘lga kiritdi.  

«Barselona»ning Chempionlar ligasi finalidagi g‘alabasidan so‘ng jamoa himoyachisi Jyerar Pike Berlindagi olimpiya stadioni darvozasi to‘rini qirqib oldi. Ispaniyalik futbolchi basketbolning ashaddiy ishqibozi bo‘lib, mana shu sport turida o‘yinchilar g‘olib bo‘lishganidan so‘ng savat to‘rini qirqib olishadi.

Manba: Xabardor.uz