Messi umumiy guruhda shug‘ullanishni boshladi

«Barselona» hujumchisi Lionel Messi olgan kichik jarohatidan to‘liq forig‘ bo‘ldi.

Marca nashrida yozilishicha, Messi kataloniyaliklarning kechagi mashg‘ulotida ishtirok etdi.

Eslatib o‘tamiz, «Barselona»ning 20 tur doirasida «Atletik»ka qarshi o‘yini (6:0) vaqtida Linoyel Messi mushaklarini shikastlab olgan va ikkinchi taymda maydonga qaytmagandi. Shu tufayli u Ispaniya kubogi doirasida 20 yanvar kuni o‘tkazilgan «Atletik»ka (2:1) qarshi o‘yinni o‘tkazib yubordi.

Futbolchi Ispaniya chempionatining 21-turi doirasida «Malaga»ga qarshi o‘yinda jamoasiga yordam berishi kutilmoqda.

Qo‘shimcha qilib aytib o‘tish joiz, «Barselona» mashg‘ulotida himoyachi Aleysh Vidal ishtirok eta olmadi. U oyog‘idan jarohat olgan. Uning shanba kuni bo‘ladigan o‘yinda ishtirok etishi savol ostida turibdi.