Velopoyga bo‘yicha jahon chempioni 37 yoshida vafot etdi

Fransiyalik velopoygachi Rober Sasson 37 yoshida vafot etdi. U saraton xastaligiga qarshi uzoq vaqt davom etgan kurashdan so‘ng ko‘z yumgan. Bu haqda 21 yanvar kuni Le Figaro nashrida xabar berilgan.

U 2001 yilda o‘tkazilgan jahon chempionatida g‘olib bo‘lgandi. Sasson shuningdek, 2000 yilgi Sidney olimpiadasida ishtirok etgan.

Marhum sportchi 2000 yildan 2004 yilgacha Cofidis jamoasi tarkibida faoliyat yuritgan. 2004 yilda doping bilan bog‘liq shov-shuvdan so‘ng 2 yilga diskvalifikatsiya qilingan edi. Shundan so‘ng u professional sportchi sifatidagi faoliyatini yakunlagandi.

Sasson Cofidis jamoasining keyingi 13 yil ichida olamdan o‘tgan to‘rtinchi vakili bo‘ldi. 2003 yilda poyga vaqtida olingan jarohat tufayli qozog‘istonlik sportchi Andrey Kivilev 29 yoshida vafot etgan. 2009 yilda esa belgiyalik Frank Vandenbruk 40 yoshida o‘pka emboliyasi tufayli olamdan o‘tgan. 2013 yilda esa fransiyalik sobiq velopoygachi Filipp Gomon 40 yoshida yurak xuruji tufayli dunyoni tark etgandi.