Qochoqlar terma jamoasi Olimpiadada ishtirok etadi

Braziliyaning Rio-de-Janeyro shahrida bo‘lib o‘tadigan 2016 yilgi yozgi Olimpiada o‘yinlarida qochoqlar jamoasi ham ishtirok etishi mumkin. Xalqaro Olimpiya qo‘mitasining shu haqidagi rezolyutsiyasini BMTga a'zo 193 mamlakatdan 180 tasi qo‘llab-quvvatlagan.

“Olimpiada—bu bag‘rikenglik, birdamlik va tinchlik degani. XOQ yuqori sa'viyali qochoq-sportchilarni ham Olimpiada o‘yinlariga taklif qilishga qaror qildi. Biz ularni qo‘llab-quvvatlash va qalblariga umid baxsh etish orqali butun dunyo e'tiborini 60 millionlik qochoqlar taqdiri va muammolariga qaratmoqchimiz”, deya mazkur qarorni izohladi XOQ rahbari Tomas Bax.

Eslatib o‘tamiz, Rio-de-Janeyrodagi Olimpiya o‘yinlari shu yilning 5 avgustidan 21 avgustiga qadar bo‘lib o‘tadi.