Tamila to‘ylarga litsenziyasiz chiqa boshladi

Xonanda Tamila biroz avval ijtimoiy tarmoq hamda messenjerlarda tarqalgan video sabab tanqidlarga uchragan edi. Bu qilmishi uchun “O‘zbeknavo” Tamilaga tegishli litsenziyani muddatidan oldin bekor qilgan hamda u bilan ishlagan “Maestro” prodyuserlik markazi ham xonanda bilan hamkorlikka chek qo‘ygan edi.

Bahorning ilk kunlarida xonanda yana tilga tushdi: ijtimoiy tarmoqlarda tez orada Tamila.uz saytida uning “Men bo‘lmasam” deb nomlangan yangi qo‘shig‘i premera berilishi haqidagi banner “aylana boshladi”.

Masalaga oydinlik kiritish maqsadida Qalampir.uz sayti Tamila faoliyat yuritgan “Maestro” kompaniyasining ma'muri bilan bog‘landi. Ma'mur Tamilaning prodyuserlik markazi bilan hamkorlikni tiklagani va to‘yga ham chiqayotganini ma'lum qildi. Shuningdek, ma'mur xonandani to‘yga chaqirish bahosi 1.500.000 so‘mni tashkil etishini ma'lum qildi.

“Bir qarashda Tamila qilgan ishlari uchun o‘z jazosini oldi dersiz. Yo‘q! Xulosa qilishga shoshilmang. Uning litsenziyasi bo‘ldi nima, bo‘lmadi nima? Aytayotgan qo‘shig‘ini internet orqali tarqatsa, kafe va restoranlardagi onlayn TVlarda ko‘rinib tursa, uni to‘yga chaqirishsa... Hozirgi zamonning “san'atkor”i uchun shuning o‘zi kifoya emasmi?

“Taxminimizcha, Tamila yana prodyuseri bilan hamkorlikni boshlagan. Biroq buni OAVga ma'lum qilishning mavridi emas. Najot Agzamov eski hamkori bilan yana ishlash niyati bor ekan, shuncha tomoshaning kimga keragi bor edi”, – deb yozadi Qalampir.uz.