Tramp: Snoudenni AQShga qaytarish kerak

3 mart kuni Detroyt shahrida bo‘lib o‘tgan navbatdagi debat chog‘ida Donald Tramp Amerika Qo‘shma Shtatlari maxsus xizmat sobiq xodimi Edvard Snoudenni Amerikaga qaytarish lozim, degan fikrini ma'lum qildi.

"Snouden josus edi. Biz uni qaytarib olib kelishimiz kerak. Agar Rossiya Federatsiyasi Qo‘shma Shtatlarni hurmat qilganda edi, o‘sha zahoti uni bizga topshirishgan bo‘lar edi”,- deb fikrini izohladi prezidentlikka da'vogar.

Edvard Snouden – siyosiy tahlilchi, milliy xavfsizlik bo‘yicha AQSh Agentligida faoliyat yuritgan. 2013 yili u AQSh maxsus xizmatining elektron kuzatuv uslublari, jumladan, xorij rahbarlarining o‘zaro suhbatlariga ham noqonuniy "quloq solishi" haqidagi ma'lumotlarni tarqatib yuborgan. Amerika hukumatining ta'qibidan saqlanish uchun 20dan ortiq mamlakat, xususan Rossiyaga ham, boshpana so‘rab murojaat qilgan. 2014 yilning 1 avgust kuni Snouden Rossiya Federatsiyasida uch yil yashash huquqini oldi. Shundan buyon u Rossiya hududida istiqomat qilmoqda.

Snouden zimmasiga AQShda josuslik qonunining ikki moddasini buzganlik aybi yuklangan. Har bir modda uchun uni 10 yilgacha qamoq jazosi kutmoqda.

Shuningdek, Donald Tramp noqonuniy muhojirlar borasidagi keskin qarashlarini o‘zgartirishi mumkinligi haqida tarqalgan xabarlarni bilvosita tasdiqladi.

Debat davomida u terrorizmga aloqadorlikda gumonlanayotgan shaxslarni so‘roq qilish paytida qattiqqo‘llik qilish, masalan, suvga bo‘ktirish va undan ham badtarroq usullar qo‘llash mumkin, deb hisoblashini bildirdi.

“Agar men prezident bo‘lib saylansam, AQSh qurolli kuchlari menga bo‘ysunadi. Men ularga terroristlarning oila a'zolarini ham yo‘q qilishni buyuraman. IShID begunoh odamlarning boshlarini oladi, ularni suvda cho‘ktiradi. Biz haqiqiy hayvonlarga qarshi kurashmoqdamiz. Men tabiatan boshqaruvchiman va shundayligimcha qolaman. Harbiylar menga itoat etishadi”, - deya ishonch bilan qo‘shimcha qildi Tramp.