Rossiya fuqaroligiga ega AQShlik mashhur bokchsi Roy Jons AQShning Finiks shahrida MMA jangchisi Vayron Filips bilan jang o‘tkazdi. Boks qoidalari bo‘yicha o‘tgan jang 47 yoshli Jonsning g‘alabasi bilan yakunlandi: bokschi o‘z raqibini 2-raundda nokautga uchratdi.
Aralash yakkakurash jangchisi Filips uchun bu jang professional boksdagi ilk jangi bo‘ldi. Bungacha u MMA’da (Aralash jang san'ati) 8 ta jang o‘tkazib, 5 tasida g‘alaba qozongan, 3 tasida mag‘lubiyatga uchragandi. Qoidalarga ko‘ra, Jons bilan istalgan odam jang o‘tkazishi mumkin edi. Buning uchun jangga nomzod nima uchun u aynan Jons bilan jang qilishni istayotganini izohlagan videoni Jonsga yuborishi kerak edi. Natijada bu huquqni Filips qo‘lga kiritdi.
Agar Filips yutadigan bo‘lsa 100 ming dollar olishi kerak edi.
2015 yil sentabrda Rossiya fuqaroligini olgan Roy Jons boks tarixida to‘rtta: 72,6 kg, 76,2 kg gacha, 79,38 kg gacha va o‘ta og‘ir vazn toifasida chempion bo‘lgan birinchi va yagona bokschi hisoblanadi. Uning hisobida 62 ta g‘alaba va 9 ta mag‘lubiyat bor.