Hybrid Air Vehicles Britaniya kompaniyasi dunyodagi eng katta havo kemasi - dirijabl Airlander 10’ni namoyish etdi. Ulkan uchar moslama bugun – 22 mart kuni Kardington aerodromida yerdan bir metr balandlikka ko‘tarildi, yaqin oylarda uning birinchi sinov parvozlari rejalashtirilgan.
Airlander 10’ning uzunligi 92 metr, bu dunyoning eng katta samolyoti - An-225 “Mriya”dan 8 metrga uzunroq. Tezligi soatiga 150 kilometr.
Samolyot, vertolyot va dirijabl ko‘rinishi va xususiyatlariga ega gel bilan to‘ldirilgan ushbu uchish moslamasi avvaliga Amerika armiyasi uchun mo‘ljallangan edi. Biroq mudofaa byudjyetiga ajratilgan mablag‘ning qisqarishi oqibatida shartnoma bekor qilingan, uchoq esa Hybrid Air Vehicles kompaniyasiga qaytarilgan edi. Shundan so‘ng britaniyaliklar uni tijorat sohasiga yo‘naltirishga qaror qilishdi.
Airlander 10 yaratuvchilari undan sayyohlik va yuk tashish maqsadlarida foydalanishni rejalashtirishgan. Apparat vertikal holatda ham ucha oladi hamda har qandan yuzaga, jumladan, muz, qum va suv yuzasiga ham qo‘na oladi. Shuningdek, dirijabl shovqinsiz va atrof-muhitga beziyon. Airlander 10 havoda besh kun davomida ucha oladi.
Hybrid Air Vehicles kompaniyasi 2018 yilgacha 12ta dirijabl qurishni rejalashtirgan. Sinovda 200 soat uchgandan keyin kompaniya tijorat parvozlariga ruxsat beradi.
Ma'lumot uchun: Tarixdagi birinchi dirijabl 1852 yili uchgan. Bug‘ dvigatelli moslamani fransuz ixtirochisi Anri Jiffar yaratgan. Eng katta havo kemasi esa “Gindenburg” bo‘lgan. Uning ilk parvozi 1936 yil 4 mart kuni amalga oshirilgan. Hajmi bo‘yicha u Amerikaning zamonaviy Boeing 747 dan to‘rt barobar katta bo‘lgan. “Gindenburg” Germaniya va AQSh o‘rtasida kruizlarni amalga oshirishi reja qilingan. Lekin 1937 yil bortda portlash oqibatida yuzaga kelgan avariya bu rejalarga va dirijabl qurilishi taraqqiyotiga ham nuqta qo‘ydi.