Malayziya sobiq bosh vaziri Maxatxir Muhammad mamlakatning hozirgi bosh vaziri Najib Razzoqni korrupsiya hamda “mansabni suiiste'mol qilish va ishonchni oqlamaslik”da ayblab sudga berdi.
Reuters agentligining xabariga ko‘ra, bosh vazir, shuningdek, “faol va ongli ravishda firibgarlik harakatlarda... huquqni muhofaza qilish organlari tomonidan olib borilgan surishtiruv-tergov ishlariga xalal berish, aralashish va qiyinchilik tug‘dirish”da ham ayblanmoqda.
O‘tgan yilning iyul oyida Amerikaning The Wall Street Journal nashrida Malayziya hukumati rahbari Najib Razzoq xususiy hisob raqamiga davlat sarmoya jamg‘armalari bilan bog‘liq 1MDB kompaniyasidan ikki yil davomida 700 million dollar kelib tushgani haqida maqola chot etilgandi. Shundan so‘ng Antikorruptsion bo‘lim, Markaziy bank va politsiya vakillaridan iborat maxsus komissiya tuzilgan, tekshiruv natijasi mahkama rahbarining shaxsiy hisob raqamida, haqiqatdan ham, bir necha yuz million dollar borligini ko‘rsatgan edi. Biroq bosh vazir ushbu mablag‘lar unga siyosiy maqsadlarda xayriya qilinganini va u bu mablag‘dan shaxsiy maqsadlarda foydalanmaganini ma'lum qilgan.