Hatton Promotions promouterlik kompaniyasi professional boksning superog‘ir vazn toifasida Jahon boks assotsiatsiyasi (WBA)ning muntazam chempioni Lukas Braunning doping mojarosi borasidagi rasmiy bayonotini e'lon qildi. Bu haqda olamsport.com xabar bergan.
“Barchani ishontirib shuni ayta olamanki, men taqiqlangan moddalar iste'moliga qarshiman va hech qachon bunday pastkashlikka yo‘l qo‘ymayman. Shu o‘rinda bir narsani aytishim kerak, men va jamoam Checheniston hududida jang o‘tkazish katta tavakkal ekanini oldindan bilgan edik. Lekin voqealar rivoji bu darajada o‘zgarib ketishini xayolimga ham keltirmagandim.
Eng alamlisi, aynan mening jamoam doping masalasiga jiddiy e'tibor qaratgan va ixtiyoriy doping nazoratidan o‘tish assotsiatsiyasi, ya'ni WADA xizmatiga murojaat qilgandi. Hozircha shu gaplarni aytish bilan chegaralanaman. Tez orada barcha masalaga oydinlik kiritiladi”, — dedi Braun.
Avstraliyalik bokschi o‘zbekistonlik Ruslan Chagayevga qarshi o‘tkazgan jangidan so‘ng doping uchun tahlil topshirgandi va uning qon namunasida taqiqlangan klenbuterol moddasi borligi aniqlangan. Bu esa Xalqaro antidoping tashkiloti (WADA) tomonidan taqiqlangan moddalar qatoriga kiritilgan. Lukas Braunda «B» namunasi natijalarini talab qilish huquqi mavjud.
Eslatib o‘tamiz, Ruslan Chagayev va Lukas Braun o‘rtasidagi chempionlik jangi 6 martga o‘tar kechasi, Grozniy shahrida o‘tkazilgandi. Unda o‘zbekistonlik bokschi raqibiga 10-raundda texnik nokaut bilan mag‘lub bo‘lgan. Jangdan so‘ng Braundan olingan doping-tahlil natijalari ijobiy chiqqan. Uning qon namunasida taqiqlangan klenbuterol moddasi aniqlangani haqida xabar berilgan edi.
Lukas Braunda aniqlangan doping yo‘talga qarshi dori tarkibida bo‘lgani aytildi