Braziliya terma jamoasi 2018 yil Jahon chempionati saralash bosqichining 5-turida o‘z maydonida Urugvay bilan 2:2 hisobidagi durang natijani qayd qildi.
Braziliyaliklar yarimhimoyachisi Duglas Kosta uchrashuvning 1-daqiqasidayoq maydon egalarini hisobda oldinga olib chiqdi (1:0). 1-bo‘lim o‘rtalarida Renato Augusto braziliyaliklar ustunligini yanada mustahkamladi (2:0).
Biroq mehmonlar hujumchisi Edinson Kavani harakatlari evaziga hisobdagi farq tez orada minimal farqqa keltirildi (2:1). O‘yindagi yakuniy natijani 2-bo‘limda hujumchi Luis Suares o‘rnatdi (2:2).
Urugvay 10 ochko to‘plagancha, 2-o‘rinda qoldi. Braziliya esa 8 ochko bilan 3-o‘ringa ko‘tarilib oldi. U qo‘shimcha ko‘rsatkichlar bo‘yicha xuddi shuncha ochko to‘plagan Paragvay va Argentinadan oldinda bormoqda.
Bu bahsdan oldin “Barselona” hujumchilari Luis Suares (Urugvay) va Neymar (Braziliya) o‘yin natijasi borasida bitta gamburgerga bahs boylashgandi. Ko‘rinishicha, endi ulardan hech biri boshqasiga gamburger "qarz bo‘lmaydi".
JCh 2018. Janubiy Amerika. 5-tur
Braziliya – Urugvay – 2:2
Gollar: Kosta, 1 (1:0); Augusto, 26 (2:0); Kavani, 31 (2:1); Suares, 48 (2:2).