Qozog‘iston O‘zbekistonga yangi elchi tayinladi

Qozog‘istonning O‘zbekistondagi diplomatik missiyasiga bundan buyon Yerik Utemboyev boshchilik qiladi.

"Qozog‘iston prezidenti Nursulton Nazarboyev mamlakatning O‘zbekistondagi elchisi vazifasiga Yerik Utembayevni tayinladi", deya xabar beriladi Qozog‘iston prezidenti matbuot xizmati.

Yerik Utemboyev 2012 yildan shu vaqtgacha Qozog‘istonning Polshadagi elchisi sifatida ishlagan. U turli yillarda Eron (2006-2009) va Lyuksemburgda (2009-2012) Qozog‘iston elchisi sifatida faoliyat ko‘rsatgan. Shu bilan bir vaqtda Utemboyev Yevropa Ittifoqi va NATOda Qozog‘iston vakolatxonasi rahbari vazifasini bajargan.

Utemboyev 2001 yildan boshlab Qozog‘iston Strategik Rejalashtirish Agentligi rahbari o‘rinbosari, 2002 yildan Xavfsizlik kengashi rahbari o‘rinbosari vazifasida xizmat qilgan. U shuningdek, Kaspiy dengizi bo‘yicha muzokaralarda Qozog‘iston vakili bo‘lgan.

Eslatib o‘tamiz, O‘zbekistonda Qozog‘istonning bundan oldingi elchisi Bo‘riboy Jyeksembin edi. Uning Toshkentdagi vakolati o‘tgan yil dekabrida yakunlandi.