Microsoft va Wacom birgalikda universal stilusni ishlab chiqdi

Bir necha kun avval Microsoft kompaniyasi Build anjumani doirasida birinchi marta yangilangan Windows 10 operatsion tizimini taqdim etdi

Apdeyt mavjud kamchiliklarni to‘g‘irlashi, shuningdek, yana bir qancha yangiliklar kirita olishi kerak. Ulardan biri Windows Ink nomli funksiyadir. U yordamida Windows 10 qurilmasining egasi turli dasturlar (masalan, Maps, Microsoft Edge, Office va boshqalar)da qo‘lyozma eslatmalarini amalga oshirishi mumkin. Biroq, anjuman doirasida Microsoft vakillari qo‘lyozma va stiluslar orqali ma'lumotlarni kirita oluvchi qurilmalar haqidagi yana bir muhim yangilik to‘g‘risida jimlik saqlashdi.

Yaqinda esa Windows kompaniyasi Wacom bilan hamkorlikda ko‘plab qurilmalar bilan foydalanish imkoniga ega universal stilus (elektron ruchka)ni yaratishi haqida e'lon qildi.

Eslatib o‘tamiz, Microsoft va Wacom avval ham birgalikda hamkorlik qilishgan – yetakchi kompaniyalarning yaratgan stilusi Surface Pro birinchi va ikkinchi avlodi uchun grafik planshetlarda foydalanilgan. Keyinchalik esa Microsoft N-Trig kompaniyasining mutaxassislari bilan hamkorlikni boshlagan.

Taxmin qilinishicha, yangi universal stilus Wacom va Microsoft mahsulotlarining eng saralarini o‘zida jamlaydi. Shu tarzda, stilus uni yozuvlar va rasmlar uchun ishlatadigan foydalanuvchilarga yoqadi.