Eng aqlli kishilar klubi nima bilan shug‘ullanadi?

MENSA deb ataluvchi jahondagi eng aqlli kishilar tashkiloti aslida nima bilan shug‘ullanadi? NUR.KZ sayti shu savolga javob topishga urinib ko‘rgan.

Stol ma'nosini beruvchi lotincha "mensa" so‘zi bilan nomlanuvchi klub aqliy qobiliyati (IQ) yuqori bo‘lgan kishilar uchun tashkil etilgan, eng yirik va mashhur notijoriy tashkilot bo‘lib, IQ testlarini yer sayyorasining 98 foiz aholisiga nisbatan yaxshiroq topshirgan kishilar uning a'zosi bo‘la olishadi.

Uning 50dan ortiq davlatda milliy sho‘'balari faoliyat yuritadi, a'zolari soni 100 davlatdagi 120 ming kishidan ortadi. Klubga 1946 yili asos solingan. Mensaning o‘z "konstitutsiya"si, ya'ni Nizomi ham bor.

Jamoa a'zolari, turli narsalarga qiziqishadi, shunga ko‘ra o‘z guruhlarini tashkil etishadi. Misol uchun, AQShda mototsiklchilar va biznes amaliyotlar bilan qiziquvchilar guruhi bor.

Aytish joizki, klub a'zolari hordiq chiqarish va ko‘ngil yozish maqsadida to‘planadilar xolos. Ular, mafiya o‘yini yoki poker o‘ynashlari mumkin. Uchrashuvlarda siyosiy, diniy mavzular muhokama etilmaydi, aksincha fan-madaniyatga oid xabarlar munozara markazida bo‘ladi.

O‘z davrida Ayzek Azimov, Jon MakAfi va boshqalar Mensa a'zolari bo‘lishgan. "VKontakte" asoschisi Pavel Durov ham shu tashkilot a'zosi ekani taxmin qilinadi.

Mensa saytida aytilishicha, klub a'zolari orasida millionerlar qatori ishsizlar ham bor. Unda, professorlar bilan bir davrada, haydovchilar, olimlar va o‘t o‘chiruvchilar, boshqa kasb egalari to‘planib fikr almashishlari, hordiq chiqarishlari mumkin.