Samir Nasri: «Agar Gvardiola meni jamoada olib qolsa, men uni xursand qilaman»

Angliyaning «Manchester Siti» yarimhimoyachisi Samir Nasri «shaharliklar» yangi bosh murabbiyi Xosep Gvardiolaning jamoada ish boshlashini kutayotgani borasida gapirib o‘tdi. 

«Ilgari uning jamoasiga qarshi o‘ynagandim. O‘shanda u meni ozgina bo‘lsada e'tirof etgan. Lekin bu besh yil oldin sodir bo‘lgandi. 

Gvardiola jamoada ish boshlaydigan paytda men eng kuchga to‘lgan davrda bo‘laman va o‘ylaymanki bu menga katta yordam beradi. Men bor kuchim bilan harakat qilaman. Uzoq vaqt maydonga tusha olmasang va keyin yana safga qaytsang, o‘zingni o‘yinga tashna his qilasan, shunda vaqtni shunchaki sarflashni xohlamaysan. Tarkibdan joy olish uchun shov-shuv ko‘tarib qaytishni istaysan. 

Agar men Gvardiolaga kerak bo‘lsam va uning jamoasida qolsam, u baxtiyor odamga aylanadi, chunki men o‘yinga juda tashna holatda bo‘laman. 

Men uning falsafasiga, o‘yin uslubiga to‘g‘ri keladigan o‘yinchi ekanimni bilaman, shunday ekan ko‘ramiz. U ajoyib murabbiy, balki dunyoning eng kuchli murabbiyi ham bo‘lishi mumkin. Uning rejalarida bo‘lsang ajoyib, agar kira olmay qolsang – yaxshi emas. 

Albatta, men jamoada qolishni istayman, shuning uchun ham shartnomamni 2019 yilga qadar uzaytirdim. Ammo men futbolchiman va o‘ynashni istayman. Agar sen zaxira o‘rindig‘ida o‘tiradigan bo‘lsang, 25 yillik shartnoma tuzishdan foyda yo‘q. Faqat o‘ynasagina bu foydali», – deya ta'kidlagan Nasri.